LABek eta EH Bilduk etxebizitza erosteko abalak ematea arbuiatu dute eta prezioen "suari gasolina botatzea" dela esan dute

LAB sindikatuak ez du batere begi onez jo Eusko Jaurlaritzak astearte honetan onartu duen dekretua, tartean, gazteek lehen etxebizitza erosi ahal izateko abal lerro bat jasotzen duena. Bere ustez, etxebizitzen prezio altuen aurrean "suari gasolina botatzea” da Jaurlaritzaren neurria, eta gaitzetsi dute bankuak eta eraikuntza enpresak "laguntza publikoz jostea".

LABek elkarretaratzea egin du astearte honetan EAJren Bilboko egoitza nagusiaren aurrean, dekretu hori atzera botatzea eskatzeko, "EAJ-PSE, hau ez da bidea! No a la transferencia de dinero público a manos privadas" lelopean.

Endika Perez LABen Gizarte Ekintzako arduradunak salatu duenez, EAJk eta PSEk nahiago izan dute "merkatua elikatzen" jarraitzea, "eraikuntza-enpresen interesei mesede egiten dieten neurriak proposatuz, arazoaren funtsari heldu beharrean ".

"Sutara gasolina gehiago botatzea da”, esan du. Sindikatuak salatu du, halaber, modu horretara “etxebizitzaren prezioa gorantz bultzatzen” dela, “banketxeen irabaziak hazten”  jarraituko” dutela, langileak hipotekatzearen kontura.  

Langile-erakundearen ustez, neurriak Etxebizitza Legea urratu egiten du, horrek "baliabide publikoak alokairu sozialera eta etxebizitza birgaitzera" bideratu behar dela ezartzen baitu.

LABen bozeramaileak adierazi duenez, eredua aldatu egin behar da “etxebizitzarekin negozioa egiteko aukerari mugak” jarriz. Horretarako, “premiazkoa” jotzen dute etxebizitzaren prezioak jaisteko neurriak hartzea. Horrez gainera, “alokairu soziala lehenestea” derrigorrezkoa jotzen du, “parke publikoa mobilizatuz".

Ildo horretan, gogorarazi du 100.000 pertsona daudela Etxebiden izena emanda, eta pertsona horien % 85 alokairuko etxebizitza eske daudela. "Horietako gehienek dirulaguntza bat besterik ez dute jasotzen, errentarien esku, higiezinen patronalaren esku", gaineratu du.

Perezen aburuz, EAE osoa tentsionatutako eremu izendatu beharko litzateke, eta merkatu pribatuan alokairua ordaintzeko laguntza-eredutik alokairu sozialeko eskaintzara igaro.

EH Bilduk ziurtatu du neurria ez dela etxebizitza politika, "finantza erakundeei mesede egiten dien eta merkatu espekulatiboa elikatzen duen" banku politika baten ondorio baizik.

"Gazteentzako oztopo nagusietako bat etxebizitza eskuratzea den testuinguru honetan, konponbideak ezin dira izan porrot egin zuten eta interes pribatuen zerbitzura dauden baliabide publikoak arriskuan jartzen dituzten formulak", ohartarazi du.

Koalizio subiranistaren ustez, "Eusko Jaurlaritzaren abal egitasmoak ez die etxebizitza krisiaren egiturazko arrazoiei heltzen, eta, gainera, horietan sakontzen du".

EH Bilduk salatu du neurriak herritar guztien sorbalden gainean jartzen duela finantza erakundeak beren gain hartzeko prest ez dauden arriskua.

"Horrela, bankuek arriskurik gabeko negozio bat ziurtatzen dute, eta funts publikoak, berriz, ordainketak burutzen ez badira, arriskuan jartzen dira. Eredu horretan, irabaziak pribatizatu eta galerak sozializatu egiten dira", nabarmendu du.