Gorbeian galdutako lau mendizale topatu ditu Ertzaintzak

Ertzaintzak gaur, larunbata, goizean Gorbeia mendiaren inguruetan galdutako lau mendizale topatu ditu, onik.

13:00 aldera, 28 urteko bi gaztek laguntza eskatu dute SOS Deiak Larrialdi telefonoaren bidez, lainoaren ondorioz galduta baitzeuden, Segurtasun Sailak adierazi duenez.

Handik ordu erdira, 50 eta 54 urteko beste bi gizonezkok Gorbeiako gurutzera zihoazela galdu direla jakinarazi dute.

Ertzaintzaren erreskate taldeak bilaketa lanak antolatu ditu, Eusko Jaurlaritzako larrialdi zerbitzuko teknikari baten laguntzarekin, eta basozainekin batera zenbait lekutan begiratu ostean, mendizaleak topatu dituzte; hasiera batean lauetako bi eta, ondoren, beste biak.