Pagasarriko hilketagatik auzipetua bilatu eta atxilotzeko agindu dute

Jesus Pueyo epaileak Iñaki A.A., 1996an Bilboko Pagasarri mendian gazte bat hiltzeagatik auzipetua, bilatzeko eta atxilotzeko agindua eman du, gaur epaitegian epaimahaiaren ebazpena jasotzera joan ez delako.

Epaileak 12:30erako deitu zituen aldeak epaimahaiaren ebazpena jasotzeko. Auzipetuak errugabetzat jo zuen bere burua, eta akusazioak duela 17 urte Nestor Gandara  gaztea hiltzea leporatzen dio.

Epaimahaiak ordu bat baino gehiago itxaron du auzipetua ager zedin, baina hilketagatik 20 urteko kartzela-zigorra jaso dezakeen gaztea ez da bertaratu; orduan, hura bilatzeko eta atxilotzeko agindua eman du.

Auzipetua Bilboko Justizia Auzitegian izan da gaur goizean, epaileak jarritako hitzordua baino lehenago, baina amarekin batera alde egin du, eta epaileak bertan behera utzi du ebazpenaren irakurketa.

Raul Segarra defentsa abokatuak barkamena eskatu du auzipetuaren izenean eta ama "oso urduri" zegoelako atzeratzen ari zirela esan du. Baina gero ez da inor agertu.

Epaiketa duela bi aste hasi zen, eta orduan hiru ziren hilketagatik auzipetuak, baina beste bien kontrako akusazioak bertan behera utzi zituzten.

Biktimaren abokatuak eta Fiskaltzak salatu zutenez, Nestor Gandara gaztea tailer batera joan zen 1996ko urtarrilaren 26an, bertan erosi berri zuen auto batek akatsak zituelako kontuak eskatzera.

Orduan, tailerreko arduradunek Iñaki A.A.ri jakinarazi zioten Gandara bertan izan zela, aurretik zuen zor bat eska ziezaion.

Autopsiaren azterketei begiratuta, akusazioak ondorioztatu zuen auzipetuak hiru kolpe eman zizkiola buruan, hil arte, eta gero gorpua amildegi batetik behera bota zuela. Hori horrela, akusazioak eta fiskalak errudun jotzea eskatu zioten epaimahaiari, krimenaren egilea delakoan.

Herri-epaimahaia atzo hasi zen erabakia eztabaidatzen eta gaur goizean irakurri behar zuen ebazpena.