% 80ko gutxieneko zerbitzuak, Bizkaiko zahar-etxeetako grebarako

Eusko Jaurlaritzak % 60tik % 80ra igo ditu Bizkaiko zahar-etxeetan, irailaren 21etik aurrera deituta dagoen grebarako ezarritako gutxieneko zerbitzuak.

Gutxieneko zerbitzuak gehitzeko Jaurlaritzaren aginduaren aurkako helegitea jarriko duela jakitera eman du gaur ELA sindikatuak. Izan ere, "sektoreko langileen gehiengoaren grebarako eskubidea bertan behera uzten" duela esan du ELAk.

Zahar-etxeetako "erabiltzaileen eta langileen egoera ez diela arduratzen argi utzi dute" Eusko Jaurlaritzak eta Bizkaiko Foru Aldundiak.

Besteak beste, 35 orduko lanaldia, soldata igoera "duina", hobekuntzak baja eta baimenetan eta lan-kargak berrikustea eskatzen dute zahar-etxeetako langileek.