Emakumeek jasaten dituzten 'egiturazko desparekotasunak' salatu dituzte erakundeek

Martxoaren 8a, Emakumeen Nazioarteko Eguna aldarrikapenerako jardunaldia dela esan du Eusko Jaurlaritzak; izan ere, aurrerapenak egon badira ere, "emakumeek jarraitzen dute mundu guztian egiturazko desparekotasunak jasaten".

Esaterako, "soldata-arrakala, botere-eremuetara eta erabakiak hartzeko eremuetara sartzeko zailtasuna, zaintzako eta etxeko eginkizunen banaketa desorekatua edo emakumeen aurkako indarkeria" aipatu ditu Jaurlaritzak astearte honetan Gobernu Bileran onartutako erakunde adierazpenean.

Eusko Jaurlaritzak mugimendu feministak pertsonen bizitza erabakien erdigunean jartzeko egiten duen aldarrikapenarekin bat egiten duela esan du, bai eta zainketak gizartean berrantolatzeko dagoen beharrarekin ere.

Horrenbestez, Jaurlaritzak berdintasun-politikekin duen konpromisoa berretsi, eta dei egiten die gizarte osoari eta gizarte-, politika- eta ekonomia-eragile guztiei, "guztion artean eskubideak bermatu eta gizarte-eredu jasangarriagoa eta berdinzaleagoa izaten laguntzeko".

Berdintasunaren aldeko Giza Agenda garatzea eskatu du Gipuzkoak

Gipuzkoako Aldundiak dei egin dio "gizarte guztiari Berdintasunaren aldeko Giza Agenda garatzeko ahaleginak batu ditzagun", adierazpen instituzional batean.

"Enplegu eskubidea, sufragio eskubidea, independentzia ekonomikoa izateko eta, gizartean eta politikan parte hartzeko eskubidea; bizitza duina izateko eskubidea -hitzaren zentzurik zabalenean-; indarkeriarik, esplotaziorik eta gutxiespenik ez jasateko eskubidea. Azken finean, gizakion berezko eskubideak, gehiago edo gutxiago gauzatuz joan direnak, etengabeko aldarrikapenei eta mobilizazioei esker, bereziki emakumeenak, eskubideen urraketa gehien pairatzen dituztenak baitira", esan du adierazpenean.

Azkenaldian, Aldundiak deitoratu duenez, "eraldaketa horren prekarietatea agerian jartzen duten egoerak ikusi izan ditugu". "Olatu erreakzionario batek bultzaturik atzera jo nahi duen gutxiengo baten eskutik" etorri direla salatu du, "gehiengook aurrera egiteko arrazoiak ikusten ditugun esparruetan".

Lurraldean  emakumeek emakume izate hutsagatik pairatzen duten indarkeriari aurre egiteko" baliabideak ezarriko dituen Agenda eskatu du. Salatu duenez, "indarkeria sistemikoa da, erantzunkidetasun maila handiagoa eskatzen duena erakundeen eta gizarte eragileen aldetik".

Indarkeria matxistaren biktima adinduentzako zerbitzuak hobetzea eskatu du Bizkaiak

Bizkaiko Batzar Nagusietako osoko bilkurak aho batez eskatu dio Aldundiari indarkeria matxistaren biktimak diren emakume adinduen "errealitatearen" diagnostikoa egiteko, pertsona horiek izaten dituzten zerbitzuak hobetzeko helburuarekin.

Era berean, indarkeria matxistak garaiz antzemateko neurriak eta sufritzen dituzten adineko emakumeak laguntzeko prozesuak hobetzea eskatu du, baita orain indarrean dauden protokoloak berrikustea.

Proposamenaren arabera, "laguntza prozesuetan kontuan izan beharko dira, eragina izan lezaketen faktore bezala, sinesmen eta iritzi sistemak, komunikaziorako zailtasunak, osasun egoera, egoera ekonomikoa, gizarteratze prozesu patriarkalaren ondorioak eta isolamendu egoera".

Kontzejuetan parte hartzen duten emakumeengan jarriko du arreta Arabak

Emakumeen parte-hartze aktiboa kontzejuetan Arabako Foru Aldundiaren kanpainaren erdigunean izango da martxoaren 8an.

Emakume gehiagorekin, gure kontzejuak irabazle leloarekin, kontzejuetan eta administrazio-batzarretan aktiboki parte hartzen duten emakumeei aitorpena egitea da helburua, Foru Gobernuak komunikatu batean esan duenez.