Euskal Herriko bero 'errekorrak': 42,6 gradu Moredan eta 43,1 Bardean

Asteazkenetik gainean izan dugun bero bolada azken txanpan sartu da larunbat honetan, baina azken txanpa hori ere gogorra izan da, alerta gorena ezarri baitute Arabako zein Nafarroako hegoalderako.

Nafarroan alerta gorria jarri zuten gaurko, Ebro Erriberan 43 gradura arteko tenperaturak espero zirelako eta bete-betean asmatu dute iragarpenek.

Nafarroako Gobernuak emandako datuen arabera, 17:00etan 40 gradu zeuden Iruñean, Lizarran, Carrascalen eta Agoitzen, esate baterako; 41 Tafallan eta Sartagudan, eta 42 gradu Tuteran. Bardean 43,1 gradura igo dira termometroak.

Araban, berriz, 42,6 gradukoa izan maximoa Ebro ibar inguruan.

Euskalmetek emandako datuen arabera, 42,6 gradu izan da tenperatura maximoa Moredan, 40,6koa Laguardian, 39,7koa Espejon eta 39,4koa Gasteizen eta Kanpezun.

Arabako hainbat estaziotan ekainean inoiz neurtutako tenperaturarik altuena neurtu da gaur.

En numerosas estaciones de Álava se han registrado hoy las temperaturas más altas de un mes de junio.#beroa pic.twitter.com/TKrHMLAciU

— Euskalmet (@Euskalmet) 29 de junio de 2019

Bizkaia zein Gipuzkoa hegoaldean termometroak ez dira 30-35 gradutik igo eta kostaldean "fresko" ere egon da. 17:00etan 19na gradu zeuden, esate baterako, Bilbon eta Donostian.

Bihar jaitsi egingo dira tenperaturak, baina Ebro inguruetan abisu horia izango da 36 gradu inguruko tenperaturak espero direlako.

Hildakoak Espainiako Estatuan

Bi pertsona hil dira Espainian beroagatik: 17 urteko gazte bat Kordoban eta 93 urteko gizon bat Valladoliden. Gainera, gizon bat larri eraman zuten atzo ospitalera Murtzian eta beste bat ere ingresatuta geratu da gaur Kordoban.