Auto-ilara oso luzeak izan dira N-1ean, Iruran, kamioi batek su hartu ostean

N-1 errepidearen errei guztiak ireki egin dituzte 20:30ean, Irura (Gipuzkoa) parean, Irunerako noranzkoan. Ondorioz, auto-ilarak amaitu egin dira ordutik gutxira.

Bertan, 438. kilometroan, lastoa zeraman kamioi batek su hartu du eguerdian, eta errepidea guztiz itxi behar izan dute. Horren ondorioz, ilara luzeak eratu dira, eta 18 kilometrorainokoak izan dira arratsaldean zehar.

16:00etan, errei bat ireki dute, eta 20:30ean, guztiz zabaldu dute. Baina Irurako irteerak itxita jarraitzen du.

Antza denez, matxura bat dela eta hartu du sua kamioiak. Suak lastoa ere erre du, eta kamioiak autobus geltoki batean gelditu behar izan du.