Dagoeneko hamaika osasun-langile sarnarekin kutsatu dira Galdakaoko Ospitalean

Galdakaoko (Bizkaia) Ospitaleko hamaika osasun-langile sarnarekin kutsatu dira dagoeneko. Agerraldia paziente batekin hasi zen, eta haren beste bi senide ere kutsatu dira. Guztiei dagokien tratamendua eman diete, ospitaleak jakitera eman duenez.

Gainera, nahiz eta gaixotasunarekin ez kutsatu, pazientearekin kontaktua izan duten gainerako profesionalak identifikatu dituzte, prebentziozko tratamendua hasteko.

Gaixotasunaren eramailea identifikatu ondoren, bertan ospitaleraturik baitzegoen, profilaxi eta isolatze neurriak hartu zituzten arduradunek, Osasun Sailak aurreikusitako protokoloa aplikatuz. Orduz geroztik, beste pazienterik eta senitartekorik ez da kutsatu.

Kasua osasun zentroko zerbitzu zehatz batean eman da, eta "normaltasun osoz" funtzionatzen ari da. Gainerako zerbitzuetan ez da kasurik antzeman.

Bizkaiko ospitaleko iturriek  azaldu dutenez, sarna eritasun arina da, akaro batzuek sortua, hots, "azaleko geruzari eragiten dioten parasito txikiek" sortuak. "Nahiz eta gure artean ezohikoa izan, kontaktu bidez erraz kutsatzen da eta negela, narritadura eta azkura sortzen ditu", erantsi dutenez.