Alerta laranja ezarri du Jaurlaritzak euskal kostaldean, itsasaldeko arriskuagatik

Eusko Jaurlaritzako Segurtasun Sailak alerta laranja ezarri du gaur, asteartea, itsasaldeko arriskuagatik. Zehazki, 09:00etatik 24:00etara egongo da indarrean, lau metrorainoko olatuak espero baitira euskal kostaldean. Halaber, tarte berean, abisu horia izango du indarrean Jaurlaritzak lehenengo bi milietan, nabigaziorako arriskuagatik.

Euskalmetek iragarri duenez, baliteke Galiziako iparraldeko kostaldearen parean Kantauri itsasoa zeharkatuko duen depresio bat osatzea, eta bihar, asteazkena, heltzea gurera. Horrek olatu handiak eragingo ditu, 3,5 metrotik gorako altuera nabarmenarekin. Hori dela eta, bi abisu hori ezarriko dituzte bihar: bata olatuen inpaktuagatik eta bestea nabigaziorako arriskuagatik.

Horrela, Eusko Jaurlaritzako Segurtasun Sailak olatuek kostaldean talka egiten duten eremuetara ez hurbiltzeko eskatu du, olatuek harrapatu eta herrestan eramateko arriskua dagoelako. Gainera, "argazki ikusgarri batek ez du behar ez den arrisku bat hartzerik merezi", gaineratu du.

Donostiako Udalak Pasealeku Berria itxi du ibilgailuentzat eta oinezkoentzat, baita Leizaolako pasealekua eta Haizearen Orrazia ere.

Gaur, asteartea, hodeiak ugariak izango dira ipar partean, eta euria egingo du bertan, batez ere kostaldean. Hegoaldean, berriz, euri gutxi egingo du, eta tarteka bakarrik. Arratsaldean, ez du euririk egingo, eta aterrune luzeak izango dira. Testuinguru horretan, haizeak hegoaldera egingo du egunaren amaieran, baina ez du tenperatura aldaketarik eragingo.

Bihar, asteazkena, eguraldi ilun eta euritsuarekin hasiko da eguna. Alde horretatik, euria ugaria eta iraunkorra izan daiteke goizean, baina, orokorrean, atertzeko joera izango du arratsalderako. Elur-mailari dagokionez, 1.500 metrotik gora egongo da egunaren lehen zatian, baina 1.200-1.300 metrora jaitsiko da arratsaldean.

Ostegunean, fronte aktibo bat iritsiko da goizaldean, eta prezipitazio ugari utziko ditu. Goizean zehar, fronteak lurraldea zeharkatu ostean, aterruneak izango dira, baina zaparradak eta ekaitzak iritsiko dira arratsaldean. Ildo horretatik, txingorra ere bota dezake.

Elur-mailari dagokionez, 700-900 metrora jaitsiko da, baina beherago ere egon daiteke tarteka. Horrela, Jaurlaritzak abisu horia ezarriko du. Goizean, mendebaldeko haizea indartsu ibiliko da kostaldean, baina, egunak aurrera egin ahala, indarra galduko du, eta arratsaldean tenperaturak nabarmen jaitsiko dira.