EAEko ikasleek terrorismoari zilegitasuna kentzen ikasiko dute bideo-joko batekin

12 eta 15 urte bitarteko EAEko ikasleek bideo-joko bat izango dute Giza Eskubideen Adierazpen Unibertsalean oinarritutako ideia totalitarioei eta terrorismoari zilegitasuna kentzen ikasteko.

Bideo-jokoa sortu eta gaur Gasteizen aurkeztu duten Fernando Buesa Fundazioak eta Terrorismoaren Biktimen Oroimenezko Zentroak EAEko bigarren mailako 400 bat ikastetxetara bidaliko dute bideo-jokoa.

Proiektu honek - "Bloggers of Concordia 6. Nik terrorismoari aurre egin nion "- Iker Balzolaren istorioa kontatzen du. Iker atentatu terrorista baten biktima izan zen  egun makuluen beharra duen gazte bat da. Bere asmoa bizi izandakoa institutuan dokumental bidez aurkeztea da. Alabaina, “zalapartari” batzuekin egiten du topo, bere aurkezpena egitea eragotziko diotela aurpegiratzen diotenak.

Bideo-jokoan hainbat pertsonaia daude, eta, galderen bidez, jokalariari talde terrorista baten definizioaren eta giza eskubideen inguruko galderak egiten dizkiote. Era askotako egoerak planteatzen dira, eta, amaieran, “zalapartariekin” "gudu" dialektiko bat dago. Azken fase horretarako, jokalariak jadanik argudio batzuk barneratu izan ditu.

Bideo-joko hau giza eskubideei buruzko "Concordia bloggers" izeneko hezkuntza-proiektu baten parte da, 2014an hasi zena. Ordutik, Fernando Buesa Fundazioak hainbat gairi buruzko bideo-jokoak prestatu ditu urtero: erlijio eta kontzientzia askatasuna; diskriminaziorik eza; berdinen arteko tratu txarrak; babes-etxe eskubidea eta jazarpen kasuak.

Aurtengo berritasuna landutako gaia bera da. Marta Buesak, Fernando Buesa Fundazioaren kideak, azaldu du beraientzat "terrorismoari zilegitasuna kentzearen gaia bereziki sentibera " dela; izan ere, Fundazioaren izena daraman gizona, politikari sozialista eta bere aita zena, 2000. urtean hil zuen ETAk.

Raul Lopez Terrorismoaren Biktimen Oroimenerako Zentroko historialariak adierazi du: "Jolastea oso gauza serioa da", bereziki terrorismoa bezalako gai batekin, "euren ideiak inposatu nahi zituzten batzuen joko odoltsua" izan baitzen.

Lopezek gogorarazi du: “Euskadin mende erdiko terrorismoak arrastoa utzi du, eta ez da gauetik egunera desagertuko". Halaber, aipatu du oraindik ere badirela ETAren historia "zuritu" nahi duten ekitaldiak, besteak beste, preso ohi batek Gasteizko campusean astearte honetan egindako hitzaldia.

Iker fikziozko pertsonaia bat da, baina benetako istorioetan oinarritzen da: Espainian ekintza terroristen ondorioz zauritu diren 240 haur eta gazteen istorioan edo mila umezurtz baino gehiagoren istorioan. Gogoratu du ETA hamar biktima horietatik zazpiren erantzule dela.

Marta Buesaren arabera, lan honek "oso mingarria" den egoera bati aurre egiteko modu bat erakusten du. Bideo-joko honetako pertsonaia adibide moduan jarrita, indarkeria erabili gabe egoera horiek salatzeko bidea adierazten du.