Errege Magoak zaldiz iritsiko dira Donostiara igande honetan

Errege Magoak zaldiz iritsiko dira igande honetan Donostiako Altza auzora. Bertatik, auto irekiz, hiriko beste auzo batzuetara joango dira, Kabalgatan parte hartu aurretik. Desfilean, aurten, 450 parte-hartzaile izango dira, eta zeliakoak eta diabetikoak diren lagunentzako egokiak diren 2.500 kilo gozoki banatuko dituzte.

Gipuzkoako hiriburuan izandako prentsaurrekoan, Jon Insausti Kultura zinegotziak azaldu du 11:00etan helduko direla Meltxor, Gaspar eta Baltasar Altzako Harria parkera, eta euren zain dauden guztiei agurra egingo dietela bertan. Horiekin batera, zaldiz ibiliko den jarraigo erreala, postari errealak eta Joselontxo’s txaranga izango dira.

Bertatik, ibilaldi "luze eta ilusioz beterikoa" hasiko dute, eta hiriko hainbat auzotara joango dira, auto ireki batean. 11:35ean, Juan XXIII.etik igaroko dira, Bidebietatik; 12:10ean, Intxaurrondoko Sagastieder plazan izango dira; 13:00etan, Martutenen; eta 13:40an, Sert plazan, Antiguo auzoan.

14:15ean, Udaletxera helduko dira. Han, udal-ordezkariak agurtuko dituzte, eta 15:30ean Bilkura Aretoan egiten den Harrerari ekingo diote. Harrera horrek 17:30era arte iraungo du.

Desfilea 18.00etan hasiko da

Arratsaldeko bostetatik, Udaletxearen terrazarako sarbidea itxiko dute, baina paje errealek Harreran egoteko aukerarik izan ez duten umeen gutunak jasotzen jarraituko dute. Horrela, Desfilea hasi aurretik eman ahal izango dizkiete Erregeei gutun guztiak. Desfilea 18:00etan hasiko da.

Bertan, Meltxor, Gaspar eta Baltasarrekin batera, ondorengoak izango dira: opariak paketatzeko Erregeen taldea, buruhandiak, ardi hankaluzez mozorrotutako pertsona batzuk, trikitilariak, txarangak, suhiltzaileak, pajeak eta postari errealak.

Berritasun gisa, Meltxor, Gaspar eta Baltasarren segizioetan ikuskizun ibiltariak izango dira; ikusleek eta ikuskizun horiek elkarri eragingo diote. Guztira, 450 lagunek hartuko dute parte Desfilean, eta zeliakoak eta diabetikoak diren lagunentzako egokiak diren 2.500 kilo gozoki banatuko dituzte.

Segizio errealak bost karroza izango ditu. Lehena oparien paketatzeko taldearena izango da, gero Jaiotza, eta, horien atzetik, Errege Magoen hiru karrozak joango dira. Gasparrenak Egipto izango du inspirazio, Meltxorrena motibo grekoak erabiliz apainduko dute, eta Baltasarrena, aldiz, gamelu bat balitz bezala egingo dute.

Desfilearen hasieran, hiru argi-izar joango dira, eta paketatzaileen karrozak eta buruhandiek ikuskizun bat eskainiko dute. Gainerako ikuskin ibiltarietan ardi hankaluzeak eta Gaudiren arkitektura modernista eta arte surrealista izango dira protagonistak. Halaber, Baltasarrekin batera, argiztatutako hiru zaldi puzgarri ibiliko dira.

Murriztutako mugikortasuna duten lagunentzako sarbidea, eta zeinu-hizkuntzaren interpretea

Insaustik adierazi duenez, murriztutako mugikortasuna duten lagunentzako sarbidea erraztuko da, Igentea kaletik, Harrerarako, eta Harria parkean eta Hernani kalean, Desfilerako. Halaber, zeinu-hizkuntzaren interpretea izango da; horrela, ume guztiek izango dute aukera esateko Erregeei zer nahi duten.

Zinegotziak azaldu du Alderdi Ederreko harreran hiru ilara izango direla; Erregeek bana izango dute, eta, hortaz, ume bakoitzak "gogokoena" hautatu beharko du. Gainera, eskatu die herritarrei ez botatzeko gozokirik edo objekturik Desfilean zehar, eta hesiak eta zintak errespetatzeko. Gogora ekarri duenez, zirkulazioan afekzioak izango ditu Desfileak, eta aldaketak izango dira autobus-lerroetan.