Zahar-etxeak eta itunpeko osasun zentroak sektore publikora pasatzeko eskatu du ELAk

Zaharren egoitzak, garbiketako azpikontrata publikoak, anbulantzia zerbitzuak eta itunpeko osasun zentroak sektore publikora pasatzeko eskatu du ELA sindikatuak ostiral honetan, koronabirusaren agerraldiak eragindako pandemiari aurre egiteko funtsezkotzat jo diren sektoreetan lan egiten dutela iritzita.

COVID-19 gaitzak kaltetutako zahar-etxeetan bizi den egoera nabarmendu du Mitxel Lankuntza ELAko idazkari nagusiak, egoitza horietan babes neurri egokirik gabe lan egiten dela iritzita, eta ELAk zahar-etxeen aurkako zortzi salaketa aurkeztu dituela gogorarazi du, bere langileentzat segurtasun neurriak eskatzeko. Horietako lautan, esan duenez, auzitegiek arrazoia eman diote sindikatuari.

Pandemiak "funtsezkoak direla erakutsi duten jardueretarako" proposamenak aurkeztu ditu gaur Lakuntzak, eta, besteak beste, ondorengo bost sektore hauek aipatu ditu: osasungintza publiko eta pribatua, zaintza lanak, garbiketa, anbulantziak eta elikagaien komertzioa. Bere esanetan, "kontratu partzialak eta soldata-arrakala handienak" dituzten sektoreak dira horiek; lan-baldintza "prekarioak" eta "gogorrak" dituztenak. Horrez gain, lan-karga altuak dituztela salatu du, eta "lehentasunezko arreta" merezi dutela azpimarratu du.

Horren aurrean, "txalo zaparradan hutsera mugatuko ote diren" edo COVID-19 gaitzaren aurrean "funtsezkoak diren sektoreen balioa aitortzeko neurriak" hartuko dituzten" galdetu die Lakuntzak Eusko Jaurlaritzari eta Nafarroako Gobernuari. Azken hori egin ezean, bi gobernuek "hipokresia eta arduragabekeria handia" adieraziko luketeela uste du Lakuntzak.

Bere iritziz, "erabaki politikoa da Osakidetzan behin-behinekotasuna % 40 koa izaten jarraitzea edo Euskadiko zahar-etxeen ereduak negozioa lehenestea".

Halaber, Unai Rementeria Bizkaiko ahaldun nagusiaren jarrera ere deitoratu du, pandemiak Bizkaiko zahar-etxeetan duen eraginaz Foru Aldundiak informatzeko duen modua dela eta: "Datuak ezkutatuz kudeaketa txar bat ezkutatzen saiatzeak beldurra areagotzen du", esan du Lakuntzak.

Bere proposamenen artean, anbulantzien zerbitzua "sektore publikora pasatzeko" eta osasuna "desmerkantilizatzeko" eskatu du ELA sindikatuak. Azken alor horretan, itunpeko osasun zerbitzuak sektore publikora pasatzea eta behin-behineko milaka langile "finko bihurtzea" eskatu du.

Halaber, genero soldaten-arrakalari eta garbitasunaren sektoreko prekarietateari aurre egiteko, administrazioarentzat lan egiten duten azpikontratak publiko bihurtzeko eskatu du ELAk. Sektore pribatuan jarduten badute, azpikontrata horiek enpresa nagusietan sartzea eskatu du.

Elikaduraren sektoreari dagokionez, koronabirusaren pandemiari aurre egiteko "funtsezkoa" den beste zerbitzu bat, hilero 500 euroko ordainsari gehigarria eskatu du ELAk langileentzat, aldi horretako lan-karga handiak konpentsatzeko eta oinarrizko soldata % 25 igotzeko, soldata-arrakalarekin amaitzeko, besteak beste.