Jatetxeak segurtasun-bermeekin berriz irekitzeko jarraibideak ematen ditu gida batek

Basque Culinary Centerrek (BCC) eta Euro-Toques sukaldarien elkarteak dokumentu bat egin dute, jatetxeek COVID-19aren bezeroen eta langileen arteko kutsadura-arriskua "ahalik eta gehien" saihestea helburu. Dokumentuaren asmoa da sektorean "erreferentzia-gida" izatea.

Txostenaren izenburua da 'Jatetxeetako zerbitzuentzako segurtasunerako eta prebentziorako COVID-19 Protokolo Berezia', eta asteazken honetan aurkeztu dute, prentsaurreko telematikoan, BCCko zuzendari Joxe Mari Aizegak, Euro-Toqueseko Zuzendaritzako kidea den Joan Roca chefak eta Espainiako Ostalaritza Federazioaren idazkari nagusi Emilio Gallegok.

Guztira, gidak 14 orrialde ditu; araudiaren arabera eguneratu eta egokituko dute. Zenbait zientzialarik eta teknikarik prestatu dute, eta Espainiako Gobernua aholkatzen duen adituen taldearen ekarpenak ere baditu.

Protokoloaren helburua da jatetxeetako segurtasuna bermatzea, eta, halaber, bezeroengan "konfiantza" sortzea, "normaltasun berrian, jakin dezaten gauzak ondo eginda daudela", nabarmendu du El Celler de Can Rocako chefak.

Neurri espezifikoak

Segurtasun-, prebentzio- eta garbitasun-neurri orokorrak ez ezik, beste neurri espezifikoak ere daude dokumentuan; neurri espezifiko horiek aretoan, barran, sukaldean, bainugeletan eta aldageletan kontuan hartzekoak dira. Dena dela, Aizegak adierazi duenez, "jatetxe bakoitzak bere errealitatearen arabera egokitu beharko ditu jarraibide horiek".

BCCren eta Euro-Toquesen web orrietan, doan dago protokoloa. Jarraitu beharreko oinarrizko hamar pauta daude bertan; adibidez, areto-uniformeak zerbitzu guztietarako aldatu behar direla, eta sukaldeko uniformeak egunero.

Nabarmentzen duenez, maskara derrigorrezkoa izan beharko du aretoan eta sukaldean, beti janaria plater gainean jartzean eta gordinean zerbitzatuko dituzten elikagaiak manipulatzean.

Edukiera murriztea

Dekalogoak proposatutako beste neurrietako batzuk dira edukiera murriztea, pertsonen arteko segurtasun-tartea bermatzeko, eta gune bat salgaiak hartu eta trukatzeko soilik erabiltzea; gune hori zerbitzutik kanpoko ordutegietan bakarrik baliatu beharko litzateke.

Proposatzen du, horrez gain, apaingarriak edo beste motako objektuak "ahalik eta gehien" murriztea, horien desinfekzioa bermatzeko aukerarik egon ezik; langileei eta bezeroei gel alkoholduna eskaintzeko beharra ere azpimarratzen du gidak.

Asmoa da "denean, garbitasuna muturrera eramatea", sukaldeko tresnerian ere bai; ez du proposatzen platerak, mahai-tresnak edo edalontziak erabili eta botatzekoak izatea, "baina aukera izan liteke", esan du Aizegak.

Chef katalana, baina, ez da holtzak jartzearen aldekoa, baldin eta mahaien artean alde egokia badago; izan ere, holtzek "sentsazio arraroa, klinikoa" eman lezakete. Hori bai, ulertzen du bakoitzak hartuko duela bere iritziz komenigarriena den erabakia, "segurtasun-inpresioa ahalik eta handiena izateko".

Basque Culinary Centerrek, maiatzaren 11tik hilaren 22ra, gehienez 100 profesionalentzako 40 ikastaroko eskaintza zuzenduko die sektoreko langileei, Aizegak jakinarazi duenez. Ikastaro horietako asmoa da sektoreari laguntza emateko, ostalariek euren jatetxeetan egokituko dituzten protokoloetan eta gomendioetan trebatzeko.