13 hildako EAEn eta bat Nafarroan azken orduetan COVID-19aren ondorioz

Koronabirusak eragindako pandemiaren ondorioz, 13 pertsona hil dira Euskal Autonomia Erkidegoan (EAE) azken 24 orduetan; beraz, orain arte, 1.442 pertsona hil dira. Halaber, 340 kasu positibo berri atzeman dituzte Euskadin (38 PCR proben bidez eta 302 test azkarren bitartez); horrenbestez, guztira 18.095 kasu baieztatu dituzte orain arte proba horien bidez, Eusko Jaurlaritzako Osasun Sailak asteazken honetan emandako datuen arabera (aurreko egunean 20:00ak arte bildutakoak).

Osasun Sailak azaldu duenez, azken 24 orduetan 73 pertsona sendatu dira (guztira 14.986). Horrek esan nahi du kutsatutakoen % 82,8 sendatuta daudela edo alta eman dietela jada.

Osasun arloko krisi hau hasi zenetik, Euskadin 140.665 PCR proba eta 83.415 test azkar egin zaizkie 116.535 pertsonari, horietatik 8.837 azken 24 orduetan. Gaur egun, 420 pertsona daude ospitaleratuta Euskadin, atzo baino 15 gutxiago; horietatik 360 gelan daude (4 gutxiago), eta 60 zainketa intentsiboetako unitatean (11 gutxiago).

Lurraldeka, Araban 85 pertsona daude ospitaleratuta (atzo baino 2 gutxiago), 355 hil dira (1 gehiago) eta 4.766 positibo atzeman dira (56 gehiago). Bizkaian, 263 pertsona ospitaleratu dituzte (aurreko balantzean baino 11 gutxiago), 806 pertsona hil dira koronabirusak jota (9 gehiago) eta 10.218 kutsatu dira (99 gehiago). Gipuzkoan erregistratu dira daturik baxuenak: 72 ospitaleratu zenbatu dituzte orain arte (bi gutxiago), 281 hildako (3 gehiago) eta 3.111 kasu (100 kasu gehiago).

Nafarroan, berriz, pertsona bat hil da azken orduotan koronabirusaren eraginez, 494 guztira, eta 115 kasu gehiago atzeman dituzte (13 PCR proben bidez eta 102 test azkarren bitartez). Datu horiekin, orain arte baieztatutako kasuak 7.752 dira guztira (5.094 PCR proben bidez eta 2.658 test azkarren bitartez).

Gainera, 3 gaixo berri ospitaleratu dituzte Nafarroan, 2.042 pandemia hasi zenetik. Horietatik, 135 paziente zainketa intentsiboetako unitatean izan dira, Foru Gobernuak adierazi duenez, eta 9 azken orduotan sendatu dira.

Bestalde, azken orduetako hiru heriotzekin, 494 pertsona dira jada koronabirusaren eraginez hildakoak (kutsatuen % 6,37). Horietatik, % 68,22 (337 pertsona) ospitaleetan jazo dira, eta % 31,78 (157 pertsona) ospitaleetatik kanpo. Hildakoen adin-tartea 26 eta 107 urte bitartekoa da, eta batez besteko adina 83 da.

Gauzak horrela, 3.297 lagun sendatu dira pandemia hasi zenetik (zaurituen % 42, 53).

Nafarroako Osasun Sistemako (publikoa eta pribatua) profesionalei dagokienez, 9 kasu berri diagnostikatu zituzten atzo, asteartea. Orain arte, pandemia hasi zenetik 865 profesional kutsatu dira, 15.000 pertsonako kolektiboaren % 5,77, gutxi gorabehera.

Espainiako Osasun Ministerioak PCR bidez baieztatutako kasu berriak jakinarazten ditu bakarrik. Proba horren bitartez, pertsona batek une horretan bertan birusa duen ala gaixo dagoen jakin daiteke. Test azkarrek, berriz, pertsona bat kutsatuta egon den ala ez jakinarazten dute, baina ez dute zehazten gaixotasuna garatu duen, uneotan duen edo dagoeneko sendatuta dagoen. Izan ere, test azkarrek pertsona batek hartutako immunitatea edo sortutako antigorputzak neurtzen dituzte, eta, beraz, iraganeko infekzio bat adieraz dezakete.

Oharra: PCR testak eta test azkarrak batu dira grafikoan

Hildako kopuruak gora egin du Espainian

Bestalde, Espainian koronabirusaren ondorioz hildako pertsonen kopuruak gora egin du bigarren egunez jarraian, 184 pertsona hil baitira azken 24 orduetan. Gauzak horrela, Estatuan dagoeneko 27.104 pertsona hil dira COVID-19 gaitzaren ondorioz.

Osasun Ministerioak gaur goizean emandako datuen arabera, herrialdean 228.691 kasu baieztatu dituzte PCR proben bitartez, alegia, 439 positibo gehiago zenbatu dira egun bakar batean.

Horrez gain, 140.823 paziente sendatu dira jada, atzo baino 2.000 gehiago (138 980). Halaber, 65 pertsona zainketa intentsiboetako unitatean artatu dituzte azken orduetan, eta 412 ospitaleratu behar izan dituzte. Kutsatutako osasun langileak 49.113 dira, 300 gehiago (48.860).

Datu horiekin, kutsatu gehien dituen munduko hirugarren herrialdea da Espainia, AEBren eta Errusiaren atzetik, eta Europako bigarrena.