Positiboak beheraka Nafarroan, EAE %11,45eko positibitatera iritsi den egunean

Eusko Jaurlaritzako Osasun Sailak larunbat honetan jakitera eman duenez, atzo 12.618 COVID-19 proba diagnostiko egin ziren Euskal Autonomia Erkidegoan, eta horietatik 1.445 positiboak izan ziren ( % 11,45eko positibotasuna).

Lurraldeka, 158 kasu atzeman ziren Araban, 641 Bizkaian, 638 Gipuzkoan eta 8 Euskaditik kanpokoen artean.

Ospitaleen egoerari dagokionez, atzo 84 pertsona ospitaleratu zituzten COVID-19arekin, eta ZIUetan 119 pertsona daude une honetan.

Udalerrietako datuak eta RO indizeari buruzko datu zehatzak ez dira astelehenera arte jakinaraziko.

Koronabirusaren bilakaera epidemiologikoak gora egin du berriz ere, beraz, eta osasungintzak jasaten duen presioa gero eta handiagoa da.

Gotzone Sagardui Osasun sailburuaren arabera, "datu horiek berretsi egiten dute Eusko Jaurlaritzak birusaren transmisioa eteteko helburuz hartutako neurri berrien egokitasuna".

"Osasun-sistemaren kolapsoa saihestu eta Gabonetara ahalik eta baldintzarik onenetan iritsi nahi badugu, gaur eta orain jardun behar dugu. Gure bizitza soziala eta mugikortasuna ahalik eta gehien murrizteko eskatzen diet pertsona guztiei, bestela konfinamendura kondenatuta egongo gara " adierazi du Osasun sailburuak.

Positiboek behera egiten jarraitzen dute Nafarroan

Txanponaren beste aldean, COVID-19 kasu positiboek behera egin dute berriro ere Nafarroan, eta 330 kasu atzeman dituzten 24 ordutan, Nafarroako Gobernuak zabaldutako eguneko behin-betiko datuen arabera.

Atzo 4.208 proba (2.265 PCR eta 1.943 antigeno-test) egin ziren, eta positibotasun tasa % 7,8koa izan zen.

Atzokoa da urriaren 6tik kutsatze kopuru txikiena atzeman den eguna.  Orduan 253 kasu atzeman ziren, eta goranzko joera hasi zen, urriaren 24ko 698 positiboen errekorrera iritsi arte.

Gorabeherekin bada ere, Nafarroan beheranzko joera antzematen da azken egunotan.

Ospitaleratzeei dagokionez, COVID-19ari lotutako 25 ospitaleratze gehiago izan ziren atzo Nafarroan, horietako 3 ZIUn, eta 7 heriotza izan ziren, 75 eta 98 urte bitarteko lau emakumerenak eta hiru gizonenak. Guztira, 755 pertsona hil dira Nafarroan, pandemia hasi zenetik.

Iruñean eta eskualdean atzeman zituzten positibo berrien % 47, Tutera  inguruan % 21 eta Lizarraldean % 13. Gainerako positiboak ( % 19) Nafarroan banatuta daude.

Adin-tarteen arabera, 45-59 urte bitartekoek osatzen dute kutsatu berrien talde nagusia ( % 25), eta 30-44 urte bitartekoek, berriz, (% 19) ondorengoa. Atzetik, 15-29 artekoak eta 15 urtetik beherakoak daude (biak % 16); 75 urtetik gorakoak % 15, eta, azkenik, 60-75 urtekoak ( % 9).

Kasu berrien batez besteko adina 44,1 urtekoa da.

Ospitaleratzeen eta alten balantzearen ostean, 393 pertsona daude COVID-19arekin ospitaleratuta une honetan Nafarroan (atzo baino 19 gutxiago), 62 ZIUn (1 gehiago) , 68 etxean ospitaleratuta (1 gehiago) eta 263 paziente, plantan.