Kutsatzeek 200eko langa igaro dute berriro Nafarroan

Covid-19 kasuak 200eko langatik behera egon dira azken bost egunotan Nafarroan, baina asteazkenen honetan joera hori hautsi, eta gorantz egin dute: 229 atzeman dituzte, hau da, % 6ko positibotasun tasa izan dute Foru Gobernuak emandako datuen arabera.

Bestalde, atzo 87 urteko gizonezko bat hil zen eta aurreko egunetan bi pertsona hil ziren, 85 urteko gizon bat eta 90 urteko emakume bat.

Nafarroan guztira 1.045 pertsona hil dira, eta birusak eragindako infekzioen intzidentzia metatua 49.233 kasukoa da.

Asteazkenean 12 pertsona ospitaleratu zituzten Foru Erkidegoan gaixotasun horrekin lotuta, bat zainketa intentsiboetako unitateetan. Ospitale-okupazioaren ikuspegitik, ospitaleratzeen eta alten balantzearen ondoren, 195 pertsona daude ospitaleratuta (atzo baino bi gutxiago) covid-19arekin; horietatik 31 zainketa intentsiboetako unitateetan daude (atzo baino bat gutxiago), eta beste 17 etxeko ospitaleratzean (atzo baino hiru gutxiago) daude. Gainerakoak, 147 gaixo, ospitaleko gela arruntetan daude (atzo baino bi gehiago).

Iruñean eta bere eskualdean kasu positiboen % 67 erregistratu zituzten, Lizarran % 9 eta Tuteran % 6. Gainerako positiboak (% 18) Nafarroako beste zonalde batzuetan banatzen dira.

Udalerri eta gune zigortuei dagokienez, Iruñeko Arrosadia auzoa ageri da denen buru beste egun batez (13 kasu). Ondoren datoz Txantrea (11) eta San Jorge (biak ala biak Iruñean), eta Barañain, 10 positiborekin. Horrez gain, Sarrigurenek bederatzi kutsatze zenbatu ditu, eta bat gutxiago, Iruñeko Arrotxapeak eta Alde Zaharrak.

Erregistratutako kasu berrien adin-tarteen araberako banaketari dagokionez, talde nagusiak 15 urtetik beherakoak eta 30 eta 44 urte bitartekoak dira, biak % 22rekin. Ondoren, 15-29 urteko taldea dago, kasuen % 21ekin, eta ondoren, 45-59 urteko taldea, % 17rekin. Azkenik, 60 eta 75 urte bitarteko taldeak daude (% 12), eta 75 urtetik gorakoak (% 6).

Positibo berrien batez besteko adina 37 urtekoa da. Generoari dagokionez, kasuen % 56 emakumeak dira eta % 44 gizonak.

Bestalde, 197 ikasle konfinatu dituzte azken 24 orduetan. Horiekin, 1.939 dira beren etxeetan isolatuta dauden ikasleak, Haur eta Lehen Hezkuntzako ikasle guztien % 3,13, alegia.

Guztira, 98 gela konfinatuta daude 58 ikastetxetan. Prebentziorako konfinamendua izan dezaketen bizikidetza-talde egonkor guztien % 2,81 dira. Azken 24 orduetan beste 37 ikasle euren ikastetxeetara itzuli dira hezkuntza presentziala jasotzen jarraitzeko.

Covid-19aren pandemiak 1.020 positibo berri utzi ditu azken orduetan EAEn, aurreko egunean baino 37 gutxiago, eta 100.000 biztanleko 14 egunetan metatutako intzidentzia zertxobait hobetu da. Positibotasun tasa igo da, baina ospitaleko presioa apur bat arindu da, ospitaleratuta dauden gaixoen kopurua eta ospitaleratze berriak jaitsi egin baitira.

Espainiako Estatuan, erkidegoek 29.960 koronabirus kasu berri jakinarazi dizkiote Osasun Ministerioari ostegun honetan; horietatik 11.388 azken 24 orduetan diagnostikatu dituzte, eta 12.544 asteazkenean. Covid-19aren pandemia hasi zenetik kutsatutako pertsonen kopuru orokorra 2.913.425ekoa da.

Bestalde, Estatuan azken 14 egunetan kutsatutakoen batez besteko intzidentziak behera egiten jarraitzen du, 100.000 biztanleko 783,25 kasu izan baitira, Carolina Dariasek zuzendutako sailak asteazkenean jakinarazitako 815,82 kasuen aldean.

Covid-19ak hildako pertsonen kasuan, 432 gehiago izan dira, horietatik 1.883 azken astean. Hori dela eta, Espainiako Estatuan guztira 60.802 pertsona hil dira koronabirusak jota.