Sagardui: "Gaur gaindituko dugu Euskadin milioi bat txertatuen kopurua"

Euskadin 999.423 pertsonak jaso dute gutxienez koronabirusaren aurkako txertoaren dosi bat igande honetara arte; beraz, astelehen honetan milioi bat pertsonara iritsiko gara, Gotzone Sagardui Eusko Jaurlaritzako Osasun sailburuak azaldu duenez.

Radio Euskadin egindako elkarrizketa batean, sailburuak udako oporraldian txertoarekin bat egin dezaketen pertsonak gonbidatu ditu txertoari lehentasuna emateko plangintza egin dezaten, eta, txertoari uko egiten badiote, "itxaron egin beharko dutela" ohartarazi du.

Pandemiaren egoerari buruz, Sagarduik esan du "itxaropenerako arrazoiak" daudela, baina jaitsiera motela dela. "Atzo 198 kasuko intzidentzia metatua genuen 14 egunera, espero dezagun gaur pixka bat gehiago jaistea", esan du.

"Albiste onak dira", baina zuhurtzia eskatu du, "goiz baita Euskadin maskara kentzeko", ohartarazi du.

Astelehen honetan, 49 eta 40 urte bitarteko kolektiboei txertoa jartzen hasiko dira Euskadin. Horiekin amaitzean, Pfizerren txertoen kopurua handitzen bada eta gainerako markek adostutakoa bidaltzen badute, sailburuak kalkulatu du agian ekainaren amaieran edo uztailaren hasieran hasiko dela 39 eta 30 urte bitarteko txertaketa.

Bestalde, Osasun Sailak ikastetxeetan hasi nahi du txertaketa (12 eta 16 urte bitarteko nerabeentzat baimenduta dagoenean), "ahalik eta lasterren, baita iraila baino lehen ere".

Uda heldu dela eta, sailburuak onartu du pertsona batzuek galdetu dutela zer gertatzen den inokulazioa oporrekin bat badatoz: "Ez dira asko (galdetzen dutenak), baina ezta bat edo bi ere, txertaketa-puntu guztietan galdetu dutelako. Txertoa jartzeko esango nieke, eta ahal den neurrian, dagokienean".

"Gauzak planifikatu daitezke, guztiok baitakigu gutxi gorabehera zein den gure txertaketa-egutegia. Erraztasunak emango ditugu, baina txertoari lehentasuna emango diogu beti. Ez dezagun ahaztu zein zorionekoak garen txertoak edukitzean. Munduko edozein lekutan eragin diezagukeen pandemia batean gaude", gogorarazi du sailburuak.

Pertsona horiek oporretara doazelako txertoari uko egiten badiote, "behar denean txertoak jarri arte itxaron beharko dute, guk adin tarteekin jarraituko dugulako", ohartarazi du sailburuak.

Txertaketa-sistema aldatuko ote den galdetuta, adibidez, erretiratu boluntarioekin lan egitea, Sargaduik esan du "iristen ari diren txertoak azkar eta eraginkortasunez emateko gaitasuna" dugula oraingoz, baina erretiratutako boluntarioengana jotzeko aukera aztertu dutela, "ez dugu epe laburrean ikusten".

SATSE erizainen sindikatuaren kritikei dagokienez, sailburuak elkarretaratzeak errespetatzen dituela esan du, baina ez du horiekin bat egiten. "Aldi baterako beharretarako lanpostuak behin-behineko kontratuen bidez sortzen dira", eta lan-baldintzak "sektore publikoko edozein kontrataziotan ezartzen diren berberak dira. Ez ditugu urratzen".

Amaitzeko, Osakidetzako hurrengo Lan Eskaintza Publikoa "ahalik eta lasterren" izatea nahi duela adierazi du.