Mutrikuko talde batek jai jardueratan parte hartzen utzi ez diola salatu du ertzain batek

Ertzain batek salatu duenez, Mutrikuko Bizixo Jai batzordeak Polizia kolektiboaren kide batek eurak antolatutako jardueratan ezin duela parte hartu esan dio. Gainera, Madalena jaietako txosna eremuan "ez agertzea hobe" zela adierazi diote, erantsi duenez.

Nahiz eta herri bazkarian parte hartzeko eta Herriko Gazte Eguneko elastikoa jasotzeko izena eman, ez diotela utziko salatu du ertzain gazteak.

Zentzu horretan, konpartsaren batzarrean, Mutrikuko "ertzain emakume bakarra" dela esan eta erabakia hartu dute, nahiz eta "diskriminazioa" suposatu, kritikatu duenez.

Azpimarratu duenez, "jaietan gazte bat gehiago da", eta ez "indar poliziala". Hala ere, urtero legez, herri bazkarira joaterik izango ez duela ziurtatu du, baina "gainerako mutrikuarrek bezala" jaiaz gozatuko duela.

Gainera, Mutrikuko lehen emakume ertzaina izatearekin "harro" agertu da. "Orain arte indar polizial" gisa egindako lana, besteak beste, genero indarkeriaren biktimak laguntzea izan dela nabarmendu du.

Bestalde, batzordeak sare sozialen bidez defendatu duenez, ez du "indar polizialik" onartuko bere jardueratan, ezta aurrera eramaten diren tokietan ere. Antolatzaileek diotenez, "Ertzaintzak errepresioa aplikatzen duen heinean Poliziari ez diote parte hartzen utziko".

Gazte Eguna igandean da eta azkenean, bertan behera utzi dituzte bazkaria eta ekitaldiak.

Erreakzioak

Mutrikuko Udalak festa guneetan diskriminazioa errefusatu eta "guztien parte-hartzea" defendatu du jaietako ekitaldietan, "elkarrekiko errespetuz eta ekitatez". EH Bildu, EAJ eta B+i Udalbatzako talde politikoek adierazpena argitaratu dute.

Udalak adierazi duenez, "eremu ez diskriminatzaileak eta herritar guztientzako toki seguruak" bermatu nahi ditu jaietan. Horregatik, "toki horietan inor baztertzea" ez du onartuko, "ezta giza eskubideak urratzea ere".

Gertakari "onargarria" ez dela erantsi dute Udalbatzako taldeek. "Diskriminazioaren biktima izan den herritarrari zein ogibideagatik baztertuak diren herritarrei babes osoa", adierazi die Udalak. "Herrian bizitzeko eskubide osoa dute", gogorarazi du.

Josu Erkoreka Eusko Jaurlaritzako lehendakariorde eta Segurtasun sailburuak "sektarismoa, intolerantzia eta esklusioa" gaitzetsi ditu.

Betoa jarri dioten ertzainarekin harremanetan jarri da Erkoreka, eta "elkartasun eta babesa" zuzenean adierazi dizkio, "baita antzeko egoera batean aurkitu daitekeen edozein agenteri ere".

"Zoritxarrez, horrelakoak oraindik gertatzen dira guren herrian, baina iragana dira, eta jarrera mota horiek gainditzea beharrezkoa da", ziurtatu du lehendakariordeak.

Ertzainari egindako "boikota gorroto eta sektarismo" urteen ondorio dela salatu du Denis Itxaso Espainiako Gobernuak Euskadin duen ordezkariak.

"Poliziaren aurkako gorroto eta sektarismo urteen ondorio da diskriminazioa, gizarteak segurtasun eskubidea duela erreparatu gabe", ziurtatu du Espainiako Gobernuaren ordezkariak sare sozialetan.

Carlos Iturgaiz Euskadiko PPren presidenteak ertzain gazteari babes osoa adierazi dio. "Mutrikuko jaietan gaur askatasun eta bizikidetza falta agerian geratu da, ertzaina izateagatik emakume bati festan parte hartzeko betoa jarri diotelako. ETAren aldeko erradikalek baztertutako gazteari Euskadiko PPren babes osoa", esan du Iturgaizek sare sozialetan.