Bilboko Aste Nagusiak utzitako datuak: 1.609 delitu, 157 atxiloketa eta 15 sexu eraso

1.609 delitu salatu dituzte guztira Bilboko Aste Nagusian zehar, 2019ko edizioan baino % 1,6 gehiago, alegia. Horien % 73 ebasketak dira baina larderiazko lapurretak, 170 salatuta, erdia baino gehiago hazi dira. Era berean, 15 sexu eraso salatu izan dira egunotan, duela hiru urte baino bat gutxiago, eta gehienak ukituengatik izan dira, Udalak plazaratutako datuen arabera.

Udalak balantze "positiboa" egin du igande honetan amaitzekoak diren jaietako segurtasun publikoari dagokionez, eta nabarmendu du "normaltasuna" izan dela nagusi. "Aste Nagusia lasai igaro da, ia delituzko ekintza larririk gabe. Hala ere, ebasketetan eta lapurretetan hazkundea antzeman dugu aurreko urteekiko, baina poliziaren jarduketa eta atxiloketen areagotzeak ere eragin du hori", azaldu du ohar batean.

Egunotan zehar, 157 pertsona atxilotu dituzte, 2019an atxilotutako 103 pertsonako kopuruaren parean (igandeko datuak faltan), hau da, % 52 gehiago. Udalaren balantzeak azpimarratu duenez, datuek argi uzten dute "Udaltzaingoak eta Ertzaintzak hiri osoan zehar zabaldutako segurtasun dispositibo sendoen eraginkortasuna, bereziki, jai esparruetan eta jende gehien biltzen duten guneetan".

Guztira, 1.609 delitu salatu dituzte Aste Nagusi osoan zehar, 2019ko 1.583 delituak baino % 1,6 gehiago. Horien artean, % 73 ebasketei dagozkie (1.175), mugikorrak eta karterak batez ere. Larderiazko lapurretek ere "hazkunde adierazgarria" izan dute, izan ere, 2019an 74 izatetik Aste Nagusiko edizio honetan 170 izatera igaro dira.

Bestalde, sexu erasoak arinki jaitsi dira: 15 salatu dituzte aurten, eta 16, berriz, duela hiru urte. Sexu askatasunaren aurkako delitu horien artean, gehienak ukituekin daude lotuta, eta ustezko egileak identifikatu dituzte edo epailearen esku utzi dituzte "ia kasu guztietan". Hain zuzen, zazpi pertsona atxilotu dituzte, eta beste zazpi identifikatu.

Ziztada salaketei dagokienez, zazpi salaketa jaso ditu unera arte Bilboko Udaltzaingoak. Horri buruz, Juan Mari Aburto alkateak goizean zehaztu du ez dela "sumisio kimiko kasurik izan".

Gainera, Udaleko poliziaren bulegoko galdutako objektuen Zerbitzu Bereziak 701 objektu jaso ditu gaur goizera arte. Gehienak dokumentazioa (315), karterak (245) eta mugikorrak (87) dira.

Horietatik, 230 itzuli ahal izan dizkiete jabeei, eta beste 68 daude jasotzeko zain, horien jabeekin harremanetan jarri eta gero. Udalak aurreikusi duenez, "litekeena da datozen egunetan itzulketa datu horiek haztea".

Suhiltzaileak, bestalde, prebentzio lanetan aritu dira bereziki, salbu larunbat honetan Epaltzaren Alargunaren kaleko 9. zenbakian piztutako sutean izandako esku hartzean.

Sindikatuek Udalaren "kudeaketa negargarria" kritikatu dute

ELA, LAB, SVPE, CCOO eta UGT sindikatuek salatu egin dute kalez jantzitako Udaltzaingoko agenteen murrizketa, baita Udalaren "kudeaketa negargarria" kritikatu ere, herritarrei "zerbitzuak emateari utzi" ere egiten diola egotzita.

"Ereindakoa jaso dute", gaineratu dute zentral sindikalek batera egin duten ohar batean, Udalaren balantzeari erantzuten.

Baietsi dutenez, "segurtasun zinegotziaren eta Bilboko Udaltzaingoko zuzendaritzaren kudeaketa negargarria nabarmenago bilakatzen da egunero".

"Eta ez da interesetan oinarritutako iritzia, egiaztatutako errealitatea baizik. Aurreko urteei dagokienez eta lan zolaren areagotze globala gorabehera, 2022ko Aste Nagusian erdira baino gutxiagora murriztu izan da jai eremuan kalez jantzitako agenteen kopurua", azaldu dute.

Gainera, agertu dutenez, "hainbat ikuskaritza minimoen azpitik daude, eta jarduketak zein herritargoaren beharrak alde batera uzten ari dira langile falta dela eta".