Lau metrotik gorako olatuak espero dira gaur eta bihar

Eusko Jaurlaritzako Segurtasun Sailak abisu horia ezarri du gaurko eta biharko kostaldean, lau metro baino gehiagoko olatuak espero baitira.

Neurria eguerdian sartuko da indarrean, eta olatuen altuera adierazgarria igotzen joatea espero da, azken orduetan, 3,5 edo 4 metrora iritsi arte. Gainera, kostaldean, mendebaldeko eta ipar-mendebaldeko haize boladek 70-80 kilometro orduko abiadura gaindi dezakete.

Abisua biharko egun osoan luzatuko da. Olatuen altuera adierazgarria 3,5 edo 4 metrokoa izatea aurreikusten da, baina erdiko orduetan 4 edo 4,5 metrora irits daiteke.

Gauzak horrela, Donostiako Pasealeku Berria ibilgailuentzat itxiko dute eguerdian, Donostiako Udalak jakitera eman duenez.

Udalak ohar batean zehaztu duenez, itxiera 12:00etatik biharko (ostirala) egun osora luzatuko da.

Oinezkoak, aldiz, "kontu handiz" ibili ahal izango dira pasealeku horretatik.