Pribatizazioarekin amaitu eta zaintza sistema publikoa aldarrikatzeko greba feministara batzeko deia egin dute
"Pertsona guztiok askatasunez eta konpromisoz zaintzeko eta zainduak izateko eskubidea" dugula aldarrikatzeko azaroaren 30ean greba feminista orokorra deitua du Euskal Herriko Mugimendu Feministak, eta hitzordurako bi hilabete eskas geratzen direla eta, mobilizazioarekin bat egiteko deia egin dute gaur feministek.
"Pribatizazioarekin eta merkantilizazioarekin behingoz amaitzea", eta "zaintza sistema publiko eta duina "galdegitea izango dituzte aldarri nagusi, azaldu dutenez.
Feministek bilkurak egin dituzte gaur Bilbon, Donostian, Gasteizen eta Iruñean, eta elkarretaratzeotan grebarako "arrazoi zerrenda luzea" gogorarazi dute. Horren ildoan, herrietan sortuta dauden greba komiteetan parte hartzeko eskatu diote jendarteari, eta greba feminista orokorraren egunean, "mugimendu feministarekin eta sozio-sindikalarekin batera kalera ateratzeko".
Elkarretaratzeotan irakurri duten adierazpenean iragarri dutenez, urriaren 7an grebarako izenpetu dute "herri akordioa" aurkeztuko dute. "Jauzi politikoa egin nahi dugu. Nork, nola eta zergatik zaintzen duen eztabaida erdigunera ekarrita. Zaintza lanak aitortu eta banatu behar dira, eta horretarako, langileen baldintza justuak lehentasunez finkatu", azpimarratu dute.
Herritarrei mobilizatzeko deia egiteaz gain, "egun bizi dugun egoeraren erantzule diren instituzioak eta zaintza lanekin negozio egiten duten enpresak" interpelatu nahi izan dituzte, baita gizonak ere. "Dagokien ardura hartu eta prozesu honetara batu daitezen" galdegin diete.
Salatu dutenez, "zaintza lanak emakumeengan, eta geroz eta gehiago, emakume migratu eta arrazaliziatuegan jartzen dira, baldintza eta esplotazio egoera muturrekoetan". Adineko egoitzen egoera ere aipatu dute, "gero eta pribatizatuago" daudenak.
"Sistema kapitalista, arrazista eta heteropatriarkala gainditu, eta guztion bizitzak erdigunean jarriko duen euskal zaintza sistema publiko eta komunitarioa definitzera goaz", aldarrikatu dute amaitzeko.
Zure interesekoa izan daiteke
Milaka pertsona kalera atera dira Madrilen, etxebizitzarako eskubidea aldarrikatzeko
Euriteek alerta egoeran mantenduko dute Mediterraneoa asteburuan, aktibo jarraitzen duten hainbat abisurekin
Milaka pertsona kalera atera dira etxebizitza duina izateko eskubidea aldarrikatzera
Juntsen ezezkoak tentsioa areagotu du Solen, eta etxebizitzaren aldeko plataformek greba orokorra dute hizpide
Euskal Herrian urriaz gozatzeko 10 plan. Zein duzu gogoko?
Alerta euriagatik penintsulako ekialdean, 150 l/m² baino gehiagorekin Castellon
Epaileak espetxera bidali du Iruñeko eskola batean ikaskidea sastatu zuen gaztea
Loiu eta Bartzelona arteko hainbat hegaldi bertan behera gelditu dira Mediterraneoko denboralearen ondorioz
"Eguraldi ona egon arren, gripea iazko ezaugarri berberekin ari da heltzen"
