Epaileak aske utzi du Gasteizen sexu-erasoagatik atxilotutako Partizanen jarraitzailea

Epaileak aske utzi du sexu-eraso baten egilea izatea egotzita Ertzaintzak atzo atxilotu zuen Belgradeko Partizanen jarraitzailea, Eusko Jaurlaritzako Segurtasun Sailak baieztatu duenez.

Jarraitzailea Baskoniaren eta Serbiako taldearen arteko Euroligako partidan atxilotu zuten, Buesa Arena pabiloian, Gasteizen, etxeko taldeak 84-83 irabazi zuen partidan.

Atxilotua epailearen esku utzi dute larunbat honetan, eta epaileak aske uztea erabaki du.

Saski Baskoniak "erabateko babesa" agertu dio erasoa jasan duen pertsonari, eta indarkeria mota guztiak gaitzetsi ditu. "Horrelako jarrerek ez dute lekurik kirolean, ezta bizitzako inongo esparrutan ere", ohartarazi du Gasteizko klubak.