Gabriela Reyesen desagerpena argitzeko eskatu dute ehunka lagunek Iruñean

Duela hilabetetik ez dago Iruñean Gabriela Reyes Sanduzelaiko bizilagunaren berririk. Gaur, desagerpenetik 30 egun bete direnean, Sanduzelai auzoko bizilagun, senide eta gertukoek manifestazioa egin dute emakumea oroitzeko eta kasua ez ahaztea eskatzeko.

Manifestazioa O parketik atera da, eta Juaristi doktorea eta Labayen doktorea kaleetatik zein Nafarroa eta Sanduzelai etorbideetatik igaro da, abiapuntura itzultzeko. 'Todos somos Gabriela' zioen pankarta bat eraman dute buruan, Dominikar Errepublikako bi banderarekin batera.

Gabriela Reyesen argazkia eta 'Ez dut kalean ausarta izan nahi, aske izan nahi dut' esaldia zeramaten kartelak ere eraman dituzte manifestariek, eta, besteak beste, 'Gabriela non dagoen jakin nahi dugu' eta 'Badaramatza 30 egun eta ez dakigu ezer' oihukatu dute.

"Gaur hilabete bete da Gabriela lagun batzuekin trago batzuk hartzera atera zela, eta egun horretatik ez dakigu ezer", adierazi die Yovanny de Leon 'Búsqueda de Gaby' taldeko bozeramaileak hedabideei. 130 kide baino gehiago ditu talde horrek.

"Horrelako egoeretan badakigu segurtasun indarrek ez digutela xehetasunik emango, baina hemen egon nahi dugu kasua ahanzturan eror ez dadin eta gure ordezkariei laguntza eskatzeko", adierazi du.

"Polizia lehen unetik ari da ikerketa egiten, baina dagokion epaitegiak sumarioa sekretupean jarri du, eta badakigu zer gertatzen den kasu horietan, zerbait jakin arte ez baitizute ezer esango", esan du. "Errespetatzen dugu, badakigu hori horrela dela, baina zerbait jakin nahi dugu, zerbait esan diezagutela", nabarmendu du.

"Itxaropenari eutsi behar zaio, hori da galtzen azkena; horregatik gaude gaur hemen, familiak babesa ematen jarraitzen dugula senti dezan, eta ez dugula bakarrik utziko honek amaiera izan arte. Dena delakoa, baina zerbait jakin arte", azaldu du.