Minbizia atzemateko Osakidetzaren programek 17.500 tumore detektatu dituzte 1995etik

Osakidetzako minbiziaren detekzio goiztiarreko programei esker, 17.500 tumore detektatu dira, gehienak fase goiztiarretan eta pronostiko onarekin, 1995ean horiek hautemateko lehen programa abian jarri zenetik.

Datorren igandean, hilak 4, Minbiziaren Aurkako Munduko Eguna dela eta, Eusko Jaurlaritzako Osasun Sailak minbizia atzemateko garatzen dituen hiru programei buruzko datuak argitaratu ditu, zerbixeko, kolon-ondesteko eta bularreko minbizia goiz detektatzeko programen ingurukoak, hain zuzen ere.

Ezagutzera eman dutenez, 1995ean bularreko minbiziaren hautemateko abiatu zuten programaren barruan 2,5 milioi miaketa baino gehiago egin dira jada, eta 12.663 tumore diagnostikatu. Horien % 84k tratamendu kontserbatzailea jaso dute. 2023an, 50-69 urteko emakumeen artean —eta 40-49 urteko emakumeen artean, lehen mailako senide batek bularreko minbizia izan badu— 709 minbizi kasu detektatu dira, gehienak oso fase goiztiarretan eta pronostiko onarekin.

Bestalde, 2009an kolon-ondesteko minbizia detektatzeko abiatutako programaren bidez, 4.519 tumore gaizto detektatu dira, horien % 71 hasierako estadioetan, eta horrek programan parte hartzen duten pertsonen % 95ek bost urtera bizirautea ekarri du. 50-69 urteko biztanleei zuzendutako programa honen esparruan, urtero 300.000 pertsona gonbidatzen dituzte proba egitera, eta, batez beste, % 72ko parte-hartzea izaten da. Horri esker, 39.929 lesio detektatu eta kendu dira, gaiztotu aurretik. 2023an, 270 minbizi inbaditzaile hauteman dira, baita gaizto izan aurreko 3.500 lesio ere.

Zerbixeko minbizia detektatzeko programa 2018an hasi zen, eta 25-65 urteko emakumeei zuzenduta dago. Umetoki-lepoko 400 minbizi-kasu identifikatu dira 2021era arte. Abian jarri zenetik 550.000 emakume baino gehiago deitu dituzte programan parte hartzera, eta 2023an 97.504 lagin aztertu ziren Donostiako Unibertsitate Ospitalean. Horri esker, programak oso eragin handia izan du biziraupenean, % 97koa izan baita.