Familien legearen proiektua onartu du Espainiako Gobernuak, aurreko legealdian bidean geratu ostean

Espainiako Gobernuak argi berdea eman dio berriro aurreko legealdian onartu ezin izan zen familien legearen proiektuari. Proiektuaren helburua da familia-eredu guztien babesa indartzea, guraso bakarreko familientzat eskubide berriak aitortzea (bi seme-alaba izanda ugaritzat hartuko da) eta kontziliaziorako laguntza-neurriak jasotzea.

Pablo Bustinduy Eskubide Sozialen ministroak esan du "mugarria" dela Espainiako politika sozialean, eta helburu duela familiei babes ekonomikoa eta soziala bermatzea, kontziliaziorako duten eskubidean sakontzea eta aitorpen juridikoan eta familien eskubideen babesean aurrera egitea.

Ione Belarrak aurreko Gobernuan bultzatu zuen testu bera da. Bustinduyk eskerrak eman dizkio ministro ohiari. Espainiako Gobernuaren helburua da proiektu hori lehenbailehen onartzea, kontsulta-organoetatik berriro igaro behar ez izan gabe.

Horrela, berriz ere legetik kanpo geratu dira hazkuntzarako prestazio unibertsala, 20 astera arteko luzapena jaiotzagatik eta adopzioagatik emandako baimenak eta gurasoentzako 8 asteko baimen berriaren ordainsaria seme-alabak 8 urte bete arte. Neurri horiek PSOEren eta Sumaren arteko gobernu akordioan daude, eta Bustunduyk aurrekontuen esparruan negoziatzea espero du.

Araua presazko prozeduraren bitartez izapidetuko da. Besteak beste, seme-alaba dituzten guraso bakarreko familiak ugarienekin parekatzen ditu, eta familia-ereduen aniztasuna aitortzen du: adopzioak, berreratuak, LGTBI, desgaitasunen bat duen kideren bat dutenak, anizkoitzak edo harrera familiak.

Gogoratu behar da Belarraren proiektuan aipatutako kontziliaziorako baimenak ekainean sartu zirela indarrean, errege-dekretu baten bidez.

Neurri nagusiak

Legeak izatezko bikoteak eta ezkontzak parekatzen ditu, eskubideei dagokienez, Estatuko erregistro bat sortuz. Erregistro horren bitartez, babes juridikoa bermatuko da eta pentsioen, lan-eskubideen prestazioen eta baimenen arloan parekatuko dituzte.

Testuak "hazkuntzari laguntzeko premia handienak dituzten familiak" kontzeptua jasotzen du, "familia ugariak" sailkapenaren ordez. Kolektibo horretako erakundeak, ordea, ez daude ados, eta Gobernua prest dago jatorrizko izen hori berreskuratzeko.

Modalitate berriaren barruan, desgaitasuna duen kideren bat duten familiak babesten dira, aurreko bikoteetako seme-alabak ere kontuan izaten dira eta bi seme-alaba dituzten guraso bakarreko familiak sartzen dira, besteak beste. Gainera, kategoria berezian sartzeko nahikoa da 4 seme-alaba izatea (orain arteko "familia ugarien" kasuan, 5 behar dira), edo 3koa erditze anizkoitzean edo errenta baxuen kasuan.

Bustinduyk nabarmendu duenez, lege honen helburua da familia-errealitate desberdinak juridikoki aitortzea eta parekatzen saiatzea, haien gizarte-babesa hobetzea eta haurren pobrezia-tasa altuen aurka borrokatzea.

Gainera, proiektuak lehen aldiz onartzen ditu guraso bakarreko familien existentzia eta beren premia espezifikoak; kasuen % 81ean, gurasoa emakumea da.

Hala, guraso bakarreko familia-titulu bat sortzen du, eta haurtzaindegi publikorako sarbidea bermatzen dio, 16 astez, haurraren bizitzako lehen bi urteetan.

Arauak elikagaiak bermatzeko funtsa hobetzen du, mantenu-pentsioa bermatuta guraso batek ordaintzen ez badu.