Eneko Goiak laguntza eskatu dio Espainiako Gobernuari Bangkoken gaixorik dagoen donostiar bat aberriratzeko

Eneko Goia Donostiako alkateak laguntza eskatu dio igande honetan Espainiako Kanpo Arazoetako Ministerioari eta Espainiak Thailandian duen enbaxadari, Asiako herrialde horretan "larriki gaixo" dagoen donostiar bat aberriratzeko. 

Kazetariei egindako adierazpenetan, Goiak azaldu du herritar honen familia duela astebete jarri zela harremanetan Donostiako Udalarekin bizitzen ari ziren egoeraren berri emateko. Goiak berak ez du gizonaren inguruko xehetasun gehiago eman.

Gaineratu duenez, "segidan, Marisol Garmendia Espainiako Gobernuak Euskadin duen ordezkariarekin hitz egin genuen, Kanpo Arazoetako Ministerioaren eta enbaxadaren bitartez, pertsona horren egoeraren berri izan zezan eta familiari hura lehenbailehen ekartzen lagun zezan".  

"Jakin dudanez, aste honetan zehar familia saiatu da bere kasa hegazkin bat bidaltzen, baina, atzo esan zidaten ez dutela lortu esperotako emaitza eta han jarraitzen duela", argitu du. 

"Atzo berriro hitz egin zuen Gobernuaren ordezkariarekin, Ministerioaren eta enbaxadaren aurrean kudeaketak egin zitzan, familiari egoera horrekin lagun ziezaioten eta, batez ere, pertsona hori Donostiara itzultzeko nahia bete zedin", berretsi du alkateak, eta "familiak oso argi du lehentasunezkoena hura ekartzea dela", azaldu du.

Bestalde, Kanpo Arazoetako, Europar Batasuneko eta Lankidetzako Ministerioak ohar bat igorri du Gobernuak Euskadin duen Ordezkaritzaren bidez, eta azaldu duenez Espainiak Thailandian duen enbaxada "hasiera-hasieratik egon da pazientearekin eta haren familiarekin harremanetan".

Ministerioak jakinarazi duenez, kaltetua 36 urteko Donostiako bizilagun bat da, pankreatitis akutua izan zuen eta Bangkokeko ospitale bateko Zainketa Intentsiboetako Unitatean sartu behar izan zuten.

Herritar horrek aseguru mediko bat du, eta Samitivej ospitalean dago, "herrialdeko onenetakoa", Ministerioaren arabera.

Gertatutakoaren berri izan zuenean, Marisol Garmendia Gobernuak Euskal Autonomia Erkidegoan duen ordezkaria Ministerioarekin hitz egiten hasi zen, eta geroztik "etengabeko harremanetan" egon da, "ahal den neurrian laguntzeko eta haren bilakaera jarraitzeko".

Ministerioak jakitera eman duenez, Espainiako enbaxada "duela hilabete ingurutik" ari da herritar horren kasua jarraitzen, bere osasun egoeraren berri izan zutenetik. 

"Ordutik, haren diagnostikoaren eta tratamenduaren etengabeko jarraipena", eta "bere eskumenen barruan dauden eta eskura dituen eginbide guztiak" egiten ari dela esan du. egiten ari dela esan du.

Enbaxada ere harremanetan egon da "hasiera-hasieratik pazientearekin eta haren familiarekin, telefonoz zein posta elektronikoz, eta ahalik eta laguntza gehien ematen ari da". "Harremanetan eta lanean ari gara", nabarmendu du Ministerioaren oharrak.