Albiste izango dira: Bilboko hilketa matxista, gazteak eta lana eta euskaltegien matrikulazio kanpaina

Honako gai hauek hartuko dituzte gaur, 2024ko irailaren 13an, hedabideetako lerroburu nagusiak:

- Bilboko hilketa matxista: Yanely Gonzalesen, bikotekideak Bilbon eraildako 31 urteko emakumearen, senideek, lagunek, mugimendu feministak eta Santutxuko bizilagunek elkarretaratzeak egingo dituzte gaur hilketa salatzeko. Biktimaren gertukoek eta Emakume Migratu Feministak deituta, bilkura egongo da 17:00etan, udaletxearen aurrean. Bi ordu geroago, 19:00etan, Santutxuko bizilagunek eta mugimendu feministak beste elkarretaratze bat deitu dute auzoan.

- Gazteak eta lana: Iñigo Juez Euskadiko Enpresari Gazteen Federazioko (Ajebask) presidentearen adierazpenek ika-mika eragin dute. Izan ere, adierazi duenez, azken bi urteetan gero eta gehiago dira "lan egiteak ez diela merezi" dioten gazteak. Horren ustez, "esku hartzeko unea da". Juez bera Radio Euskadin elkarrizketatuko dute gaur, eta eragile sozialen erreakzioa ere espero da. Igor Arroyo LABeko idazkari nagusia, esaterako, Radio Vitorian dago. 

- Euskaltegien matrikulazio kanpaina, abian: Gaur, ostiralarekin, da hastekoa euskaltegien matrikulazio kanpaina. 24/25 ikasturtean, berrikuntza gisa, doakoak izango dira A1 eta C1 maila eskuratzeko eskolak. Jaurlaritzak ia lau milioi euro bideratuko ditu euskara ikasteko erraztasunak emateko. Interesadunek (denek A1aren kasuan, eta 16-18 urtekoek, C1arenean) matrikula besterik ez dute ordaindu beharko, eta  maila lortuz gero, kopuru hori berreskuratu egingo dute.