EHUk gelatik babestuta atera behar izan duen irakasleak egindako iruzkinak aztertuko ditu

"Irakasleak sare sozialetan, bere eremu pribatuan, egindako iruzkinak ikusita, gure ustez bateraezinak izan daitezke gure unibertsitatearen kode etikoaren printzipio eta balioekin, eta egoera aztertuko dugu", azaldu du Euskal Herriko Unibertsitateak (EHU) gaur Leioako campusean Zuzenbide Fakultatetik babestuta irten behar izan duen irakasleari buruz.

Ikasleen elkarretaratze batek ikaslea kanporatzeko eskatu du gelaren aurrean, sareetan gorroto-mezuak zabaltzea egotzita. Dozenaka ikasle bildu dira eskola ematen zuen ikasgelaren aurrean.

EHUko segurtasun langileek lagunduta irten behar izan du gelatik. Unibertsitateak gertatutakoa gaitzetsi du, eta Ernaik (baketsua izan behar zuen elkarretaratzearen deitzailea) esan du ez dutela "jarrera faxistarik edo homofoborik" onartuko ikasgeletan. Irakasleak, bere sareetan, abortuaren aurkako edukiak argitaratu ditu, Falangearen aldekoak, eta txio bat, honakoa esanez: "Zer 'bujarra' itxura duten Euskadiko PPko askok".

EHUk ohar baten bidez azaldu duenez, gaur goizean, 11:15 aldera, eskola ematera joan da, 11:30ean hasteko. Ikasgelan sartu ondoren, gazte talde batek eskolaren hasiera oztopatu du, ikasleei gelan sartzea galarazi die eta, ondoren, irakasleari irtetea galarazi dio.

EHUren arabera, laguntzera joan diren unibertsitateko langileez gain, irakaslea eta harekin batera unibertsitateko hainbat ordezkari bi orduz atxiki dituzte "beren borondatearen aurka, oihu eta mehatxu artean". 13:15 pasatxo zirenean, irakaslea gelatik atera da, segurtasun zaindariek lagunduta.

Hori dela eta, Euskal Herriko Unibertsitateak "erabat" gaitzetsi ditu gertakari horiek. "Onartezina da unibertsitatean inor erasotua, hertsatua edo mehatxatua izatea. Irakasle bat bi orduz atxikitzeaz ari gara, jarrera erasokorreko testuinguru baten erdian. Eta ez dago aitzakiarik ekintza horiei zilegitasuna emateko, normaltasun akademikoa indarrez galarazteko", gaineratu du.

Ertzaintzak 12:40 aldera jaso du EHUko Zuzenbide Fakultateko segurtasun-langileen deia. Ertzainak bertaratu dira fakultateko zaindariak babestera, baina ez dute esku hartu, irakaslea eskolatik atera baita segurtasun-langileek babestuta, eta protestariak sakabanatu egin dira.

Ostegunean, Ernaik bideo bat zabaldu zuen X sare sozialean. Irudi horietan ikus daitekeenez, bere bi militantek irakasle horren bulegoko atea pintura gorriz margotu zuten eta 'faxista' hitza idazi zuten leihoaren kristalean.

Bideoarekin batera, Ernaik "propaganda klasista, misoginoa, LGTBIfobikoa eta espainolista" sare sozialetan zabaltzea egotzi zion irakasleari, eta "onartezintzat" jo zuen EHUk "giza eskubideak eta duintasuna zapaltzen dituen pertsona bat kontratatzea".