Gorpuzkiak topatu dituzte Leturren, desagertutako lau pertsonaren bila dauden bitartean

Gaztela-Mantxako 112 Larrialdi eta Urgentziak Koordinatzeko eta Artatzeko Zerbitzuak jakinarazi duenez, gorpuzkiak aurkitu dituzte Leturreko (Albacete) Las Ramblas eremuan. Gune horretan joan den asteartetik desagertuta dauden lau pertsonen bila ari dira erreskate taldeak. 

Iturrion arabera, atzo topatu zituzten giza gorpu zatiak, eta Guardia Zibila gorpuzkiak aztertzen ari da, identifikatze aldera. Antza, gorputz-adar bati dagozkie aurkitutako gorpuzkiak.

Desagertutakoen artean daude uholdeak eraman zuen etxe batean zegoen bikote bat, eta urak eramandako furgoneta batean zihoazen bi udal langile. 

Gutxienez, bi pertsona hil dira Albaceteko herri horretan. Igandean, 70 urteko emakume baten gorpua aurkitu zuten La Longuera izeneko eremu batean, udalerritik 12 kilometrora. Antonia zuen izena hildakoak, eta etxean zegoen eraikina behera etorri zenean. Beste zendutakoa asteazkenean aurkitu zuten, udalerritik kilometro eskasera. Dolores zuen izena eta 92 urte zituen.