Le Scouarnec zirujauak bere "erantzukizuna" onartu du 299 biktimari egindako bortxaketetan eta abusuetan

Joel Le Scouarnec zirujauak, 299 biktimari (horietako asko adingabeak ziren) bortxaketak eta sexu-abusuak egiteagatik epaitua, bere "erantzukizuna" onartu du gaur.

"Egin dudan triskantza nire erantzukizuna da, ez nire ingurukoena", aitortu du akusatuak, Vannes hirian (Bretainia) bere aurka egiten ari diren epaiketan egindako lehen deklarazioan.

Bere bizitzari buruz eta leporatzen dizkioten delituak egitera zerk bultzatu zuen azaltzeko testigantzan aitortu duenez, "inoiz" ez du umetan eta gaztetan bere portaera azal dezakeen ezer aurkitu. "Ez dut batere oroitzapenik ezeren biktima izan nintekeenik. Inola ere ez", onartu du.

Dagoeneko 74 urteko Le Scouarneci 2020an 15 urteko kartzela-zigorra ezarri zioten beste delitu sexual batzuengatik —lau adingabe bortxatu eta abusuak egitea; horietako bi, bere ilobak—. Gaur akusatuak bere bizitzaren errepasoa egin du, eta haurtzarora itzuli.

Akusatuaren aitak berak abusuak egin zizkion bilobari, baina Le Scouarnec ez zen horretaz jabetu atxilotu zuten arte, eta gaur azaldu du: "Nire aitak nire semeari egin ziona nik haur askori egin diet".

Deklarazio horretan, lehen aldiz aitortu du bizilagun batzuen sei urteko alaba bortxatu zuela, 2020an zigortu zuten kasuetako bat, nahiz eta orain arte ukatu egiten zuen bortxaketa.

"Bi bizitza nituen: familiako bizitza, soziala eta profesionala, eta denbora luzean izan nuen pederasta baten bizimodua. Haur-pornografiaren menpeko nintzen. Abusuak eta bortxaketak bata bestearen atzetik gertatzen ziren", gogorarazi du.

Bestalde, Aude Buresi Morbihango Auzitegiko presidenteak eta akusazio partikularretako hainbat abokatuk emaztearen isiltasunaren gainean egindako galderen aurrean memoria hutsuneak dituela argudiatu du Le Scouarnecek. Kirurgialariaren emaztea 2023ra arte ez zen dibortziatu, arlo ekonomikoan haren aldeko banantze-akordioa lortuta.

Joan den asteko deklarazioan, emazte ohiak ukatu egin zuen medikuak egindako delituak ezagutu eta isildu izana, nahiz eta kontrakoa adierazten duten testigantzak izan.

Epaiketa honetan Le Scouarneci leporatzen zaizkion delituek, batez ere, koaderno batzuetan idatzitakoa dute oinarri. Koaderno horietan, egunero, anestesiaren eraginpean zeuden pazienteen aurkako ekintzak kontatzen zituen akusatuak.

Ikerketa zuzendu zuen poliziak, Sylvain Boissinotek, adierazi zuen akusatuak atxilotu ondoren aitortu zuela koaderno horietan idatzitako guztia egin egin zuela.