Ertzaintzak argi du 2021ean Bilbon hilda agertu zen gizona erail egin zutela

2021eko urrian Bilbon hilda topatu zuten gizonaren heriotzaren nondik norakoak ikertzen ari den Ertzaintzako agente batek esan duenez, "homizidioa izan zen". Bilboko hilketa eta beste lau hilketa egotzi dioten gizonezkoaren kontrako epaiketan eman ditu azalpena ertzainak. "Ezin dut ziurtatu hura akabatzeko asmoz gertatu zen ala lapurreta egitera joan eta eskuetatik joan zitzaiolako izan ote zen. Baina argi daukat hil egin zutela", baieztatu du. 

Herri-epaimahaiarekin egiten ari dira epaiketa, eta bigarren saioa izan da ostegun honetan, Bizkaiko Epaitegian. Fiskaltzak 16 urteko espetxe zigorra eskatzen du akusatuarentzat, hilketagatik, eta akusazio partikularrak zein herri-akusazioak, 39 urtekoa. Defentsak, berriz, iruzur delitua baino ez du aitortzen. 

Gaurko saioan hamaika pertsonak deklaratu dute. Tartean kasua ikertzen ari diren unitateetakoertzainak, eta biktimaren nahiz akusatuaren lagunek. Epaiketak ostiralean jarraituko du, froga perizialekin. 

Biktima hilotz topatu ostean haren etxebizitza miatu zuten agenteek kontatu dutenez, "dena bere tokian" zegoen eta, "itxura batean" ez zegoen "indarkeria-zantzurik". Horregatik ez ziren hatz-markak hartu, ez eta beste froga batzuk ere. 

Biktimaren anaiak, ordea, anaiaren heriotzaren ondorengo egunetan haren kontuetan mugimenduak zeudela salatu zuen, eta ordenagailu bat ere desagertu zela. Orduan ekin zitzaion ikerketari. Iruzurrak argitzeko taldeko agenteetako batek azaldu duenez, mugimenduen artean arreta eman zion izen batek, 2019an antzeko gertakariengatik ikerketapean izan zuten gizonezko baten izenak, hain zuzen ere. 

Diru-txartelarekin dirua atera zen kutxazainetako irudiak lortzerik izan ez badute ere —pasatako denboragatik dagoeneko ezabatuta zeuden—, argitu du lurrindegi batekoak eskuratu ahal izan zituztela, eta horretan ageri da erosketa bat egiten ari zirela. 

Irudi horietan hiru gizonezko agertzen ziren, eta horietako bi identifikatzea lortu zuten. Eman duen informazioaren arabera, akusatua ageri da —"zalantzarik gabe" identifikatu zuen, 2019ko ikerketa zela eta— "txartela atera eta ordainketa egiten" eta, beste gizonezko bat, "saltzailearekin hizketan". Bigarren hori fitxa polizial baten bitartez identifikatu zuten. Biak ere ikerketapean jarri zituzten, lapurreta eta iruzurretan ari zirelakoan. 

Ordenagailuari dagokionez, agenteek atzeman zute "egun baten edo biren buruan" saldu zuela, biktimaren etxetik "oso gertu" zegoen denda batean, 213 euroren truke. "Pertsona bakar batek" egin zuen salmenta hori. 

Epaiketan azaldu dutenez, 2021eko beste gertakari batek begira eman zien, izan ere, "inguru berean" gertatu zen eta "modus operandi" antzerakoarekin, nahiz eta, kasu horretan, biktimak ihes egitea lortu zuen. 

Modus operandi hori azaldu du ertzain batek. Haren hitzetan, aurrena gizon homosexualekin elkar ikusteko aplikazio baten bidez ezagutzen zituen, "haien etxean geratzea" lortu eta gero "txartelak eta kontuetako gakoak lortzen saiatzen zen, dirua lapurtzeko". 

Biktimaren bi lagunek eta lankide batek ere deklaratu dute gaurko saioan, eta pertsona "zentzudun eta bizkorra" zela azaldu dute, "bizimodu ordenatua" zuela, eta ez zuela ez drogarik ez alkoholik kontsumitzen. 

Lagunek berretsi dute Interneteko plataformak erabiltzen zituela jendea ezagutzeko eta "mutil latinoekin" kontaktatzen zuela batez ere. "Norbait ezagutu" zuela kontatu zien biktimak neska biei. 

Akusatuak hamar urteko zigor irmoa du Bilbon beste gizon bat hiltzeagatik eta Basauriko espetxean dago preso.