20 pertsona atxilotu eta 39 emakume askatu dituzte sexu-esplotazioaren aurkako makro operazioan

Ertzaintzak eta Polizia Nazionalak 20 pertsona atxilotu eta 39 emakume askatu dituzte, Hego Euskal Herriko eta Espainiako Estatuko hainbat probintziatan ziharduen sexu-esplotazioko sare baten aurka batera egin duten polizia-operazioan. 

EITBk egindako elkarrizketa batean, Mikel Trekuk, operazioa egin duen Ertzaintzaren dibisioko buruak, baieztatu du lortu dituztela "operazioaren helburuak", eta, ikerketa ia itxitzat eman dutela.

Ikerketa 2024an hasi zen, Ertzaintzak sarearen berri izan zuen orduan. Ondorioztatu duenez, sexu-esplotaziorako sareak jatorrizko herrialdeetan erakartzen zituen emakumeak, batez ere Brasilen, lan-baldintza hobeak aginduta. Behin Estatuan zeudela, bidaia eta ostatua ordainarazi eta zorra kitatzeko agintzen zieten, eta horretarako prostituzioan aritzera behartzen zituzten. Sareak hainbat sare sozialetako kanalen bidez eskaintzen zituen emakume horien sexu-zerbitzuak, luxuzko prostituzio gisa.

Operazioa astearte goizean hasi zen, ekainaren 3an, eta EAEko eta Estatuko hainbat herri eta hiritara zabaldu zen.

Ertzaintzak atxiloketak eta miaketak egin zituen Gasteizen, Bilbon, Zornotzan eta Basaurin. Bestalde, Polizia Nazionalak Irunen, Iruñean, Logroñon, Santanderren, Zaragozan eta Figueresen (Girona) egin du operazioa. Guztira, 20 pertsona atxilotu dituzte, horietatik 12 EAEn, eta 39 emakume askatzea lortu dute.

Hainbat tokitan egindako miaketetan, atxilotuek erabilitako dokumentazioa, dirua, droga eta ibilgailuak konfiskatu dituzte.

Euskal Autonomia Erkidegoan liberatutako emakumeei GKE espezializatuen laguntza eman zaie, biktima diren heinean, egin beharreko tramite administratiboen ondoren.

Atxilotuei delitu hauek leporatu dizkiete: talde kriminala, gizakien salerosketa, inor prostituitzera behartzea, atzerriko herritarrak urratzea, osasun publikoaren aurkako delitua eta kapitala zuritzea. Polizia-eginbideak amaitutakoan epailearen esku uztea espero da.