Espedientea ireki diote Bizkaibus bateko gidariari, Bakion asto bat autobusera igotzen uzteagatik

Bizkaiko Foru Aldundiak modu "irmoan" gaitzetsi du asto bat bere ibilgailuetako batean sartu izana Bakion (Bizkaia), eta diziplina-espedientea zabaldu dio gertakarietan inplikatutako gidariari.

Gaur, Haiekin elkarte animalistak abeltzain bati aurpegiratu dio zerbitzu publikoko autobus batera astoa igota pertsonak "dibertitzen" uztea, sare sozialetan zabaldutako bideo batean ikus daitekeenez.

Bizkaibusek gertatutakoa gaitzetsi du, eta adierazi du "tamaina handiko animalia bat, asto bat adibidez, garraio zerbitzu publikoko ibilgailu baten barruan sartzea guztiz onartezina" dela, "erabiltzaileen, gidarien eta animaliaren beraren segurtasuna arriskuan jartzen baitu".

Zerbitzuko arduradunek, gainera, gertakariaren berri eman diote Ertzaintzari, horrek zigor penal edo administratiboren bat suposatu dezakeelakoan.

Bizkaibuseko buruzagien ustez, "barne arau-haustea baino haratago doan jokabidea da, eta ondorio legalak izan ditzake".

Argitu dutenez, ez dute horrelako jarrerarik onartzen, "zerbitzuaren arauak urratzen dituztelako eta pertsona guztien ongizatea eta segurtasuna arriskuan jartzen dutelako".

Haiekin elkarteak jakinarazi duenez, joan den larunbatean Bakion grabatutako bideo bat helarazi diete. "Bertan ikusten denez, pertsona talde batek asto bat indarrez sartzen du autobusean, ustez, Gaztelugatxera eramateko".

Autobusa "ohiko geltokitik" kanpo zegoen, San Pelaioko Bide Nagusiko 50 zenbakian dagoen taberna baten ondoan, azaldu dutenez.

Elkarteari jakinarazi diotenez, "astoa herriko abeltzain batena da, eta larunbatero ateratzen du, koadrilek ondo pasa dezaten, tabernetan sartuz eta, ondoren, autobusera igoz".

Elkarte horren ustez, "tamalgarria da animalia bat jazartzen, estutzen eta tratu txarrak ematen dibertitzea, eta are kezkagarriagoa da garraio publiko bateko gidariak, gizarte osoak ordainduta, jokabide hori babestea ".