78 urteko emakume baten hilketa indarkeria matxista gisa ikertzen ari dira Nafarroan

Guardia Zibilak 78 urteko emakume bat hilda aurkitu du Zizur Nagusian (Nafarroa), buruan kolpe handi bat zuela, eta indarkeria matxista kasu bat izan daitekeela ikertzen ari dira.

Ikerketako iturriek jakinarazi dutenez, biktimaren senarrak eman du emaztearen heriotzaren berri, gaur, 14:30ak aldera.

Agenteak iritsi direnean, buruan kolpe handia zuela aurkitu dute emakumea, odoletan eta ohe gainean.

Iturriek zehaztu dutenez, 85 urteko gizonak diskurtso inkoherentea zuen, eta lehenengo ikuskapenean, agenteek odol zantzuak zituzten toallak eta burkoak aurkitu dituzte edukiontzi batean, bikotearen etxebizitzatik gertu.

Horren guztiaren aurrean, guardia zibilek atxilo eraman dute senarra.

Udalaren gaitzespena

Jon Gondan Zizur Nagusiko alkateak "emakumeen aurkako edozein indarkeria motaren aurrean udal gisa erabateko gaitzespena" azaldu du, eta indarkeria hori desagerrarazteko erakundearen "konpromiso irmoa" agertu du.

Udalak adierazpen instituzional bat argitaratu du, ustezko hilketa gaitzesteko eta “haserrea” azaltzeko.

Erakundeak azpimarratu duenez, "emakumeen aurkako indarkeria mota guztiak beren osotasun fisiko eta moralaren aurkako erasoa dira, eta, ondorioz, giza eskubideen urraketa larria eta onartezina. Hilketa matxismoaren adierazpenik larriena da, bai eta lehen mailako arazo soziala ere, batez ere sufritzen duten emakumeen duintasun eta osotasun fisiko eta moralaren aurka egiten duena".

Udalak "berdintasunaren aldeko eta emakumeen kontrako indarkeria guztien aurkako politika aktibo, integral eta koordinatuen bitartez gizarte bidezkoagoa eta berdinagoa lortzeko konpromisoa berretsi du".

Gainera, "indarkeriaren aurkako borrokan paper aktiboa" izateko deia egin die herritar guztiei. “Guztiok jarrera aktiboa izan behar dugu emakumeen aurkako edozein indarkeria adierazpenen aurrean, ez dugu indarkeria onartzen, ez gara isilik egongo eta gure babesa adierazi behar diegu indarkeria jasan dutenei", erantsi du erakundeak, protesta elkarretaratze bat deituko dutela aurreratuz.

Kasu hau hilketa matxista dela baieztatuz gero, aurten genero indarkeriak 23 emakume hil ditu Espainiako Estatuan; 1.317, 2003tik.