Gaur ez dago sute aktiborik Asturiasen eta Galizian, baso-suteak piztu zirenetik lehen aldiz

Asturiasek eta Galiziak atseden eguna dute gaur, udan baso-suteek eragin duten sufrimendua erabat desagertu ez bada ere; izan ere, sute aktiborik gabe esnatu dira gaur, ostirala, batean zein bestean.

Hobekuntza 18 eguneko lan eta borroka handiaren ostean heldu da Asturiasera. Bertan, 6.000 hektarea kiskali dira. Baso-suteen larrialdia hasi zenetik lehen eguna dute gaur sute aktiborik gabe. Hala ere, erretako sei inguru kontrolatzen ari dira, foku berririk ez sortzeko: Ibias, Degaña, Cangas del Narcea, Somiedo, Tineo eta Cabrales.

Suteen bilakaeraz galdetuta, Adrian Barbon Asturiasko presidenteak balorazio positiboa egin du, eta bere esker ona adierazi die asteetan zehar lehen lerroan egon diren guztiei. Larrialdi maila 2tik 1era jaitsi du Printzerriko Gobernuak.

Llanesko bizilagun bat baso-sutearekin lotuta atxilotu dutela zabaldu ostean, mendiari su ematen diotenentzako zigorrak gogortzeko eskatu du Asturiasko presidenteak: "Pertsonen bizitza arriskuan jartzen dutenak gaizkileak dira".

Bien bitarean, Galiziak ere sute aktiborik gabe hasi du ostirala, abuztuan baso-suteak piztu zirenetik lehen aldiz. Casaioko (Ourense) sutea, aktibo izan den azkena, kontrolatutzat eman dute ostegun arratsaldean.

5.000 hektarea kiskalita, Casaiokoa Galiziako su kezkagarrienetako bat izan da, Porto de Sanabriatik (Zamora) zabaldu baitzen. Horrekin batera, beste batzuk (A Pobra do Brollón eta Avion ingurukoak) egonkortu egin dituzte ostegunean. Horrela, dagoeneko ez dago aktibo 20 hektarea baino gehiago erre duen suterik.

Galiziako Xuntaren arabera, suteen eragina oso handia izan da; izan ere, 96.000 hektarea baino gehiago kiskali dira, gehienak Ourensen. Horrenbestez, aurtengoa mende honetako urterik txarrena izan da Galizian suteei dagokienez.

Zenbait eskualdetan tenperaturak behera egitea eta prezipitazioak izatea funtsezkoak izan dira suaren hedapena geldiarazteko. Larouco, Chandrexa de Queixa eta Xinzo de Limiako sute historikoak kontrolatuta edo egonkortuta daude jada.

Gaztela eta Leonek eta Asturiasek zaintzari eutsi diote

Gaztela eta Leonen eta Asturiasen foku aktiboak daude oraindik. Leongo eta Zamorako suak egonkor daude; Asturiasen, berriz, Ibiasko San Antolineko sutea da kezkagarriena, hainbat herrigune hustu behar izan baitituzte.