Ertzaintzak identifikatu ditu jada Bilbon 21 urteko gizon bat hil zuten hiru lagunak

Bilboko Solokoetxe auzoan atzo goizean izandako hilketa ikertzen eta hiltzaileen bila jarraitzen du Ertzaintzak, Eusko Jaurlaritzako Segurtasun Sailak astelehen honetan jakinarazi duenez. EITBk berri izan duenez, identifikatuta dituzte dagoeneko krimenaren ustezko hiru egileak, eta horien bilaketa da orain egiteko nagusia.

Atzo, goizeko zazpiak laurden gutxitan, Ertzaintzak abisua jaso zuen, Fika kaleko 33. atarian istiluak zeudela esanez, eta bertaratutako agenteek gizon bat topatu zuten, bularrean arma zuriz egindako zauria zuela. Larrialdi zerbitzuek Gurutzetako Ospitalera eraman zuten, eta bertan hil zen eraman eta gutxira.

Biktima identifikatu dute azken orduetan: 21 urteko gizona, jatorriz, marokoarra.

Ikerketa, zabalik

Lekukoen arabera, borroka baten ostean gertatu zen erasoa, eta liskarrean makilak eta, antza, botilak ere erabili ziren. Atzo, Ertzaintzak inguruko bizilagun eta tabernariekin hitz egin zuen informazioa biltzeko, eta hainbat toki ere miatu zituen.

Batetik, Fika kaleko 33. zenbakiaren parean biktima aurkitu zuten lekua; bestetik, metro gutxira dagoen Zumarraga kaleko eraikin bat, ustez erasotzaileak bertan egon direlakoan; eta, azkenik, inguruko edukiontziak, lekuko batek adierazi duelako erasotzaileetako bat zerbait botatzen ikusi zuela.

Polizia zientifikoak laginak hartu ditu azken orduetan, eta erasoan erabilitako arma bilatzen jarraitzen du.

Bien bitartean, ikerketak zabalik jarraitzen du.