Euskadin adingabeei egindako sexu abusuen biktima ia denak (% 92) neskak dira, eta gehienak, 15 urtetik beherakoak

Euskadin sexu-abusuen biktima diren adingabe ia denak (% 92) neskak dira, eta gehienak, 15 urtetik beherakoak, Save The Children gobernuz kanpoko erakundeak ostegun honetan argitaratutako txosten baten arabera.

Haurren kontrako sexu-abusuen inguruko 88 epai (108 biktima) aztertu ditu, 2019tik 2024ra bitartekoak.

Zehazki, biktima gehien-gehienak 15 urtetik beherakoak ziren erasoak gertatu zirenean (% 88), bostek 15 urte zituzten, eta gainerako zortziak 15 urtetik gorakoak ziren. 

Halaber, aztertutako epai guztietan akusatua gizona zen. Hala ere, erasotzailearen profila aldatzen da urtearen arabera. 2019an, akusatu gehienak begiralea, hezitzaileak (14 salaketa) edo familiakoak (9 salaketa) ziren; 2023an, erasotzaile gehienak adingabearen gertuko pertsona bat zen —28 kasutan amaren bikotekidea, senideak edo ezagunak—, eta 2024an erasotzaile gehienak ezezagunak (3 kasu) ziren. 

10 kasutik 7,5etan, gainera, erasotzaileak ez zuen aurrekaririk (67, guztira).

Datuek erakusten dutenez, 10 kasutik 6tan epaia iritsi arte bi urte baino gehiago pasa ziren (25), eta solik kasuen % 19,5ean (8) lehen bi urteetan. Azken urteetan, oro har, prozesuen iraupena murriztu egin bada ere, oraindik ere gehienak bi urte baino gehiago luzatzen dira. 

Aztertutako kasuek agerian uzten dute kondenak gehiago direla absoluzioak baino. Adibidez, 2023an eta 2024an 75 kondena eta 13 absoluzio zenbatu ziren.

Espainiako Estatuan biktimen % 82,9 neskak dira

Espainiako Estatuari dagokionez, adingabeen aurkako sexu-abusuak biktimak 12 urte dituela hasi ohi dira, batez beste, eta 10etik 8tan neskatoak edo nerabeak dira. Gainera, kasuen % 87,8tan biktima bakarra da.

Estatuan adingabeen aurkako sexu-abusuei buruzko 345 epai aztertu dituzte, 421 biktima, denera.

Hiru kasutik batean hiru urte baino gehiago luzatzen da prozesu judiziala, eta badira epaia izan arte bost urte igarotzen direnak ere.

Sexu-erasotzailearen profilari dagokionez, akusatuen % 98 gizonak dira, eta 10 kasutik 8tan biktimak eta erasotzaileak elkar ezagutzen dute, gehienetan inguruko pertsona bat izaten da.

Gobernuz kanpoko erakundearen arabera, gaur egun indarrean dagoen sistemarekin, biktima gehienek behin eta berriro kontatu behar izaten dute gertatutakoa. Aztertutako hiru kasutik batean biktimaren testigantza grabatu zen, baina oraindik ez da ohikoa. Gainera, grabatu zen kasuen erdietan baino gehiagoan biktimak berriro deklaratu behar izan zuen. 

ZURE INTERESEKOA IZAN DAITEKE: Nola funtzionatzen du sexu-abusuak pairatu dituzten adingabeei arreta integrala emateko Barnahus ereduak?

Hori dela eta, Save the Childrenenek Barnahus eredua (umeen etxea, islandieraz) ezartzearen alde egin du. Aipaturiko metodoak sexu-abusuak jasan dituzten adin txikikoei arreta integrala ematen die, biktima erdigunean jarriz, gertaturikoa behin eta berriro errepikatu behar ez izateko.