Ertzainek esan dute debekatutako jaurtigaiak "poltsa batetik erori zitzaizkiela", Amaia Zabarteren abokatuaren arabera

Amaia Zabarte Realeko zalearen abokatu Iker Sarriegik ostiral honetan azaldu duenez, kargak baino ordu batzuk lehenago "debekatutako" foam jaurtigaiak "poltsa batetik erori" zitzaizkiela adierazi dute Donostiako epaitegian agertu diren ertzainek. Iaz Paris Saint Germain taldearen aurkako partida baten aurretik izandako istiluetan Ertzaintzaren karga batean zauritu zuten emakumea.

Gainera, esan du ikertutako ertzainek ez dietela bere galderei erantzun nahi izan. Abokatuaren arabera, "ustekabean datu bat jakin da gaur; izan ere, gertakarien egun berean, ordu batzuk lehenago foam SIR-X motako jaurtigaiak erabiltzea debekatu zuten, indartsuenak baitira, eta SIR motakoak bakarrik jaurti zezaketen".

Hala ere, "partida aurretik hiru foam SIR-X jaurti zirela ageri da atestatuan". Sarriegik ziurtatu duenez, "foamezko piloten poltsatik erori" zitzaizkiela esan dute Donostiako epaitegian agertu diren ertzainek.

Ikertutako ertzainen artean Zabarteren aurka jo zuen foam jaurtigaiaren ustezko tiroaren egilea ote zegoen galdetuta, abokatuak azaldu du ertzainetako inork ez duela gogoratzen nork egin zuen jaurtiketa hura. Zazpi ertzainek deklaratu ondoren (bost ikertu eta bi lekuko), agenteek "kargak nondik egin zituzten ez dakitela" adierazi du buruan zauritutako Realeko zalearen abokatuak.

"Tiroen egileari aurpegia jartzera nator"

Amaia Zabarte Realeko jarraitzailearen senarra, Joseba Novoa, Donostiako epaitegietara gerturatu da goizean, bere emaztea zauritu zuen ertzainari "aurpegia jartzeko". 2024ko martxoan Paris Saint Germain taldearen aurkako partidaren aurretik izandako istiluetan zauritu zuen Ertzaintzak Zabarte. Horren haira, sei agentek deklaratu dute gaur Atotxako epaitegietan, instrukzio epailearen aurrean.

Inputatu gisa deklaratu dute horietako lauk, eta lekuko gisa beste biek.

"Aurpegia jarri nahi nion, haiek nire aurpegia publikoki ezagutzen baitute", esan du.

Gainera, Ertzaintzako sindikatuek Gipuzkoako hiriburuan arratsaldean egin duten elkarretaratzeari buruz esan du erabat gaitzesten duela indarkeria, "inoiz ez delako gauzak konpontzeko bidea izan behar".

"Sindikatuei eskatzen diet gizartearen lekuan jartzea. Haien egoera erraza ez bada ere, protokoloak beharrean, jarrerak aldatu beharko lituzkete", erantsi du.

Bestalde, Ertzaintzaren Barne Gaien saila kritikatu du "manipulatzen eta gezurretan jarraitzen dutelako". Halaber, ohartarazi du gertatutakoa ezkutatzen saiatu arren, irudiak daudela.

Bukatzeko, adierazi du jardunbidea "negargarria" izaten ari dela, eta oraindik lekuko nagusiak deklaratu behar duela; agente batek zauritu zuenean bere emazteari laguntzen egon zen emakumeak, hain zuzen. Zentzu horretan, ziurtzat jo du epailea auzia ixten saiatuko dela.