Airearen kalitatea "egokia" da Iurretan, Smurfit Kappa paper fabrikan sutea piztu eta biharamunean

Iurretako Udalak jakinarazi duenez, Eusko Jaurlaritzak Bizkaiko udalerri horretako airearen kalitatea aztertzeko egindako neurketek "dena ondo" dagoela baieztatu dute, eta, beraz, "ez dago osasunerako inolako arriskurik".

Sutea atzo arratsaldean piztu zen Smurfit Kappa paper fabrikaren kanpoaldean. 50 bobina paper erre ziren, Udalaren arabera. 

Erretakoa papera zenez, errautsa inguruko herrietara heldu zen. Atzo bertan, neurketak egin zituen Osasun Sailak, eta "guztiak zuzenak" izan zirela jakinarazi zuen.

Gaur, badaezpada, neurketa gehiago egin dituzte, eta "dena ondo" dagoela baieztatu dute berriro ere; are gehiago, atzotik "parametroek behera egin dute" euriari esker. 

Bien bitartean, kiskalitako materiala "mugitzen eta bustitzen" jarraitzen dute Bizkaiko Foru Aldundiko suhiltzaileek. Luze joko omen du guztiz amatatzea.

160.000 euroko galerak

Smurtif Kappa lantegiko zuzendaritzak ETBri azaldu dionez, lantegiaren kanpoaldean pilatuta zeuden 400 tona paper bobina erre dira sutean, eta guztira 160.000 euroko galerak izan dituzte.

30 urtean ez da horrelako suterik izan, eta ikerketa abiatu dute zerk eragin duen argitzeko. 

Bestalde, 14 orduz itxita egon den N-634 errepidea gaur goizean zabaldu dute berriro. Atzo bidetik oso gertu zeuden garrak, eta Ertzaintzak errepidea itxi zuen, badaezpada, bi noranzkoetan. AP-8 autobideak Iurretan duen ordainlekua ireki zuten, Iurreta eta Zornotza artean doan erabili ahal izateko.