Nahi duzun karrerara sartzeko gutxieneko nota atera ez baduzu, zer egin?

Unibertsitatean nahi duzun karreran sartzeko gutxieneko nota lortu ez duzula ikustea kolpe latza da. Etxe askotan urduritasun, frustrazio eta ezjakintasun egunak dira, eta ikasle zein senideek galdera bat darabilte buruan: Eta, orain, zer? Ate bat ixten denean, ordea, ezinbestekoa da alternatibak aztertzea. Horixe da, hain zuzen ere, ikastetxeetako orientatzaileen zeregin nagusia une hauetan.

"Beti esaten diegu ikasleei aukera guztiak mahai gainean jartzeko, ikuspegi zabalago batetik aztertzeko dena", adierazi du Maialen Aranbarri Urretxu Zumarraga Ikastolako (Lizeoko) Batxilergoko orientatzaileak. Soka ez eteteko, prozedura argi bat gomendatzen du: "Orokorrean, Lanbide Heziketan eta hainbat unibertsitatetan izena ematea aholkatzen diegu. Garrantzitsua da jakitea Goi Mailako Zikloetatik ere irits daitezkeela nahi duten gradu hori egitera", nabarmendu du Aranbarrik.

Dena dela, beste bide batzuk aztertu aurretik, unibertsitateko atea ez da guztiz ixten ekaineko emaitzekin; lehenengo alternatiba unibertsitatearen barruan bertan dago.

Nola funtzionatzen dute EHUra sartzeko itxarote-zerrendek? Hori da ikasle askoren zalantza nagusia. Mireya de Castro eta Maite Urtiaga EHUko orientazio teknikariek mezu argi eta itxaropentsua bidali dute: "Bai, itxarote-zerrendak matrikulazio-prozesu osoan mugitzen dira. Aurten, adibidez, uztailaren 11tik irailaren 8ra sei onarpen-zerrenda argitaratuko dira; beraz, oso garrantzitsua da zerrendei adi egotea".

Azaldu dutenez, mugimendu handia egoten da Osasun Zientzietako graduetan, adibidez. “Nota altua dutenez, ikasleek hainbat unibertsitate eta probintziatan egiten dute eskaera, aukera gehiago izateko”.

EHUko adituek erantsi dutenez, beste aukera bat da ezagutza-adar bereko antzeko gradu batean izena ematea: "Gradu batzuek irakasgai asko dituzte amankomunean eta kreditu asko konbalidatzen dira, baina kasuz kasu aztertu beharko litzateke". Hala, informazio guztia aldez aurretik ezagutu eta aztertzea da estrategiarik onena erabakia hartzerako orduan.

Azken urteetan joera hori nabaria da eta gero eta ikasle gehiagok jotzen dute bide horretara. Jon Busto Tolosaldea LHko komunikazio arduradunak argi dauka zikloak bide estrategikoak direla, laneratzeko zein unibertsitatera jotzeko: "Prestakuntza praktikoa eta enplegagarritasun handia eskaintzen ditu, aukera akademikoak itxi gabe". Adibidez, Kirol graduan (JFKZG) sartu ez direnek zikloetara jotzen dute ondoren unibertsitatera jauzi egiteko.

Unibertsitaterako bide horretan, baliozkotzeak hitzartuta daude karrera batzuekin (2+3 eredua). "Informatikako zikloetatik EHUko Ingeniaritzara pasatzeko, gradua hiru urtean amaitzeko hitzarmena daukagu", azaldu du Bustok. Halaber, Batxilergoko orientatzaileak uste du LHren gaineko aurreiritzi negatibo aldatzen ari dela, unibertsitatera jotzea errazten duelako eta lanerako aukerak ematen dituelako.

Nolanahi ere, Tolosaldeko adituak aurrematrikula garaian izena ematearen garrantzia ohartarazi du: "Komeni da ateak irekita uztea, badaezpada ere".

Uztailean berriro aurkeztea nota igotzeko aukera bat da, baina muga batekin. Lizeoko orientatzaileak ohartarazi duenez, ezohiko deialdiko nota-igoerak zerrendetan geroago sartzea dakar, eta plazak ia beteta egon ohi dira. Ekaineko azterketak berrikustea ere aukera bat da, "baina ikasleak ziur egon behar du, nota jaisteko arriskua ere badagoelako".

Urte sabatikoari dagokionez, Maialen Aranbarrik onartu egin du gutxitan gertatu zaiola, eta adierazi du baliagarria izan daitekeela, kasu batzuetan, norbere burua argitzeko, baina helburu zehatzekin: "Denbora ondo antolatzea komeni da, adibidez, unibertsitatera sartzeko probak (USaP) prestatzeko". 

Atsedenaldi horri etekina ateratzeko, beste bide batzuk ere proposatu ditu: "Atzerriko hizkuntzak ikastea, kanpora joatea edo lanean hastea, esperientzia eta heldutasuna eskuratzeko".

Badira beste bi aukera mahai gainean, bakoitza bere argi-itzalekin: Euskal Herritik kanpoko unibertsitate publiko batera joatea eta unibertsitate pribatua aukeratzea. Pribatuan ez dute, oro har, gutxieneko notarik eskatzen. Batxilergoko orientatzaileak muga nagusia aipatu du: “Kanpora edo unibertsitate pribatura joatearen eragozpen handiena gastuak dira. Familien aldetik kezka jasotzen dugu”. 

Adituak bat datoz: Nahi den unibertsitate-karrerara iristeko ez dago bide bakar bat, eta alternatiba guztiak kontuan hartzea da estrategiarik onena.