Zergatik dabiltza jendea etxegabetzen, alokairua ordainduta ere?

Asteazken honetan, Madrilen, Maricarmen etxegabetu dute, desgaitasuna duen 87 urteko emakume bat, alokairua ordaintzen zazpi hamarkada eman dituen arren. Irudi horrek lerroburura ekarri ditu, berriz ere, etxegabetzeen drama eta putre-funtsen eraso espekulatiboa. Zergatik etxegabetu ditzake funts putre batek alokairua ordaintzen dituzten maizterrak?

Felipe Gonzalezen Espainiako Gobernuak 1994an onartutako Hiri Errentamenduen Legeak horren oinarriak ezarri zituen, ondorengoentzako errenta zaharraren baldintzak aldatu baitzituen.

Gurasoak hil ondoren, Maricarmen zazpi hamarkadaz bizi izan den etxearen alokairu-kontratua subrogatu egin zen. Eta hantxe bizi izan da, inbertsio-funts batek etxebizitza-blokea erosi eta kasua auzitegietara eramatea erabaki zuen arte.

Hasiera batean Justiziak arrazoia maizterrari eman bazion ere, Auzitegi Gorenak subrogazioa amaitu zela ebatzi zuen, eta hortik aurrera, funtsak hileko kuota igo egin zion Maricarmeni, 500 eurotik 1.650 eurora.

Asteazkenean, laugarren etxegabetze saiakeran, idazle anonimo batek emakumeak ordaindu ezin duen zatia osatzeko eskaintza egin zuen arren, Polizia Nazionalak etxegabetzea gauzatu zuen, eta Maricarmen bere etxetik atera zuten, ohatilan, eta anbulantziaz ospitalera eraman zuten.

Milaka pertsona atera ziren asteazken honetan Madrilgo Chamberi auzoan, Madrilgo Erkidegoak erositako atiko polemikoaren aurrean, "Ayusoren atikoa Maricarmeni eman" diezaioten. Elkartasun mobilizazioak Bartzelonan, Sevillan, Oviedon eta Valentzian ere egin zituzten.

Arlo politikoan, Pedro Sanchez Espainiako Gobernuko presidenteak agindu du bere Gobernuak "premiaz" bidaliko duela Parlamentura etxebizitzari buruzko errege-dekretu berri bat, datarik zehaztu gabe, eta "erantzukizuna" eta "ikuspegi zabala" eskatu die talde parlamentarioei, onar dezaten eta honen gisako  "tragedia" gehiagorik gerta ez dadin.

Erandion (Bizkaia) 120 familia daude Maricarmenen patu bera izango duten beldur. Hamarkada bat baino gehiago daramate alokairuan bizitzen Tartangan (Erandio), Los Ochos izeneko eraikinetan.

Higiezin horiek erosi zituen funts putreak bere etxebizitzak saltzeko kontratuak bertan behera utzi nahi ditu orain. Bizilagunek iragarir dute mobilizazioak eta borroka sindikala sustatuko dutela, etxegabetzea saihesteko.

Alokairu-kontratuak berrituz etxean jarraitu ahal izatea eskatzen dute. Higiezin-saltzaileen iragarkietan 300.000 euroko prezioan eta garestiago salgai daude, eta egungo maizter gehienek ezin dituzte erosi.