Maiezterren sindikatuak ohartarazi du Solen kanpatuta jarraituko dutela Espainiako Gobernuak etxegabetzeen kontrako dekretua onartu arte

Atzo Madrilgo Puerta del Sol plazan abiatutako kanpaldiari eutsiko diotela nabarmendu du gaur, igandearekin, maizterren sindikatuak. Han izango dira Espainiako Gobernuak ‘Maricarmen dekretua” onartu arte, ohartarazi du Alicia del Rio sindikatuko bozeramaileak. Arlo sozialetik ez ezik, alderdi politikoek ere dezente estutu dute Sanchez presidentea. Sumar bazkideak mehatxu egin dio ministroen kontseilura ez joatearekin, eta Juntsek adierazi du ez duela onartuko “jabe txikien kriminalizazioa”.

Maricarmenen etxegabetzea salatzeko Madrilen egindako manifestazioaren ostean, 300 bat lagunek egin dute gaua Solen; eguerdirako, 500 bat ziren. Lasai joan dira lehen orduak, eta bildutakoek argi dute helburua: Espainiako Gobernuak asteartean onartzea etxebizitza eskubidea arautzeko eta etxegabetzeak debekatzeko dekretua.

Besteak beste, “alokairu kontratu mugagabeak” egiteko aukera galdegin dute, “Maricarmen gehiagorik egon ez dadin”.

Inbestidura bazkideen ere presio

Monica Garcia Osasun ministro eta Sumar eta Mas Madrid taldeen buruzagiaren ustez, etxebizitza dekretua “bai ala bai” onartu behar du Espainiako Gobernuak, asteartean bertan, eta “gobernua eta legegintzaldia bera jokoan” daudela ohartarazi du.

Ildo beretik mintzatu da Yolanda Diaz bigarren presidenteorde eta Lan eta Ekonomia ministroa ere. Nabarmendu duenez, asteartean onartu beharrekoa ezin da “edozein dekretu” izan, eta “funts putreen kontra egin behar du nahitaez”. “Ez dute Espainian zergarik ordaintzen eta langileen kontura irabazten ari dira”, arrazoitu du.

Dekretua aurrera ateratzeko Juntsekin negoziatzen ari da Espainiako Gobernuak, eta hain zuzen, “funts putreak geldiarazteko bada” alde bozkatuko dutela iragarri du Jordi Turullek. Hori bai, ohartarazi duenez, ez dute onartuko “jabe txikiak kriminalizatzea”.

EH Bilduk maizterren sindikatuak egindako eskaerekin bat egiten duela azpimarratu du, eta etxegabetzeen aurrean “babes iraunkorra” emango duen dekretua defendatu du.  

Azkenik, EAJren izenean, Aitor Estebanek esan du posible dela dekretua onartzea, baina azpimarratu du horretarako alderdiek “minimoen akordio bat” bilatu beharko dutela.