Iaz baino % 1,7 haur gutxiago jaio dira EAEn bigarren hiruhilekoan

3.249 haur jaio dira Euskal Autonomia Erkidegoan (EAE) aurtengo bigarren hiruhilekoan, iazko epe berean baino % 1,7 gutxiago, Eustatek emandako datuen arabera. Lurraldeka, Bizkaian jaitsi da gehien jaiotze tasa (% 3,9), eta ondoren, Araban( % 0,4). Kontrara, jaiotzek gora egin dute Gipuzkoan, iazko epe berean baino % 0.9 gehiago.

Adinari erreparatuta, 30-34 urteko amen taldea izan da ugariena, jaiotzen % 35,7rekin, eta, ondoren, 35-39 urtekoak % 32,2rekin. Nabarmentzekoa da, 25 eta 29 urte bitarteko amek 40 urte edo gehiagokoak gainditu dituztela, % 13,2 %11,5en gainetik. Oso gutxi dira (% 7,4) 25 urte baino gutxiagorekin haurra duten emakumeak. 

Jaiotzen ia % 52 lehen seme-alabak izan dira, eta heren bat baino gehiago, bigarren seme-alaba. Kasuen % 13,1en hirugarren edo ondorengo seme-alabak izan dira, 2025eko hiruhileko berean baino % 0,3 gutxiago.

Aipatzekoa da, halaber, ezkontzaz kanpoko jaiotzak guztizkoaren erdia baino gehiago direla (% 52,3), iazko epe berean erregistratutako portzentajearen gainetik (% 50,1). Lurraldeka, Arabako eta Bizkaiko ezkontzaz kanpoko jaiotzen ehunekoak EAEko batez bestekoaren gainetik daude, % 54,9 eta % 54,4, hurrenez hurren. Gipuzkoan, aldiz, ehuneko hori txikiagoa izan da , % 48,3.

Eustatek amen nazionalitateari buruzko datuak ere eman ditu, eta jaiotzen % 24,1ean atzerriko nazionalitatea zuten (1,4 puntuko beherakada). Araba da atzerriko ama gehien dituen lurraldea (% 31,5), eta Bizkaian eta Gipuzkoan, berriz, % 21,5 eta % 24,4 dira, hurrenez hurren.

Azkenik, apirila eta ekaina bitartean, jaiotza gehien maiatzean izan dira(% 34,4); ondoren, ekainean (% 33,1), eta azkenik, apirilean (% 32,5).