Moriako migratzaileen ebakuazioan laguntzeko eskatu die Bruselak EBko herrialdeei

Ylva Johansson Europar Batasuneko Barne komisarioak Moriako migratzaileak ebakuatzeko deia egin du, ahalik eta baldintza duinenetan bizi daitezen.

"Bai, Lesbosetik migratzaileak ebakuatu behar ditugula uste dut. Hori da 12.000 pertsona horiei bizi baldintza duinak emateko aukera bakarra", adierazi du Europako Parlamentuko Justizia eta Barne batzordean.

Moriako errefuxiatuen kanpamenduan sutea piztu zen asteartetik asteazkenerako goizaldean, herena kiskalita geratu zen eta 4.000 pertsona aterperik gabe gelditu ziren. Alabaina, asteazkenean beste sute bat izan zen eta garrek kanpaleku guztia suntsitu zuten.

Johanssonek premiazkotzat jo du migratzaileak ebakuatzea, baina erantsi du Greziako Gobernuari dagokiola Bruselari laguntza hori eskatzea egoeraren larritasuna aztertu eta gero.

Errefuxiatuen bizi baldintzak "onartezinak" direla azpimarratuta, Europar Batasuneko estatuek hondamendi horretan lagundu behar dutela esan du, Bruselaren koordinaziopean.

Horrez gain, migratzaileak "babes legalik gabe eta harrapatuta" aurkitzen direla deitoratu du, eta atxilotze zentroetan egon daitezkeen denbora mugatu egin beharko litzatekeela esan du. Hala, irailaren 30ean asilo eskubideari eta migrazioari buruzko proposamen bat aurkeztuko duela iragarri du.  

Frantziak, Alemaniak eta Herbehereek etorkinak hartuko dituzte

Bestalde, Emmanuel Macron Frantziako presidenteak baieztatu du bere Gobernua Alemaniarekin batera proposamen bat egiten ari dela, suteen ondorioz etxerik gabe geratu diren migratzaileen zati bat bere gain har dezan EBk. "Europako ahalik eta herrialde gehienak inplikatzea da helburua", azaldu du.

Macronen eta Angela Merkel Alemaniako kantzilerraren arteko kontaktuen ondorioz, Greziatik bakarrik dauden 400 adingabe ebakuatzeko akordioa sinatu dute dagoeneko, Alemaniako Gobernuko iturriek Dpa albiste agentziaren arabera. Iturri horien arabera, oraindik ez dago argi banaketa nola egingo den.

Moriako kanpalekutik ehun bat errefuxiatu, bakarrik dauden adingabeak eta egoera ahulean dauden pertsonak Herbehereetara eramatea adostu du dagoeneko Herbehereetako Gobernuak.

Harreran hartuko diren pertsonak "bakarrik dauden 14 urtetik beherako berrogeita hamar pertsona" izan beharko dira, eta gainerakoak "seme-alaba adingabeak dituzten familia-harremanetako pertsonak", egoera ahulean daudela uste bada.

Hala ere, Espainiako Gobernuak aurreratu du Espainiak ez duela aurreikusi Moriako eremuan izandako suteak kaltetutako errefuxiatuen ardura hartzea, etorkin irregular asko hartzen dituela argudiatuta, eta "elkartasuna" eskatu die lehen muga ez diren herrialdeei.

Arancha Gonzalez Laya Kanpo Arazoetarako ministroak "erabateko elkartasuna" adierazi dio Greziari gertatutako tragediaren aurrean, baina Espainiak dagoeneko "errefuxiatu, asilo eskatzaile eta, oro har, etorkin ugari hartzen dituela" eta, beraz, Moriako migratzaileak hartuko dituztela esan du.

BIDEOA | Lesboseko herritar batzuek Moriako sarrerak itxi dituzte