Egiptok eta Qatarrek proposatutako su-etena onartu du Hamasek, baina ez Israelek
Israel eta Hamasen arteko negoziaketak bideratzen ari diren bi herrialdeek, Egiptok eta Qatarrek, proposatutako su-etena onartzen duela adierazi du gaur arratsaldean Hamasek.
Erresistentzia Islamikoaren Mugimenduak Al Jazeera hedabidean zabaldutako oharraren arabera, Ismail Haniyak proposamena onartzen duela jakinarazi die Mohamed bin Abulrahman al Zani Qatarreko lehen ministroari eta Abbas Kamel Egiptoko inteligentzia buruari. Zabaldutako informazio apurraren arabera, proposamenak hiru fase lituzke, bakoitza 42 egunekoa, eta bigarren faseak Israelgo tropak Gazatik erabat erretiratzea aurreikusten du.
Hala ere, albistea zabaldu bezain laster, Israelgo iturriek adierazi dute Israel ez dagoela gauza bera egiteko prest eta ez dutela proposamena onartuko, "ez delako onargarria". Gainera, Israelgo goi-kargudun batek adierazi duenez, Hamasen iragarpena "Israel gaizki uzteko, su-eten ituna oztopatzen duen agente gisa uzteko" saiakera izan daitekeela uste dute. Asteleheneko azken orduan, Benjamin Netanyahu Israelgo lehen ministroaren bulegoak X sare sozialean argitaratutako mezu batean azaldu duenez, Qatarrek eta Egiptok egindako su-eten proposamena "urrun dago" Israelek eskatzen dituen baldintzetatik. Ordezkaritza bat bidaliko du Israelgo Gobernuak aukera guztiak "agortzeko", baina Rafako erasoaldiarekin aurrera jarraituko duela berretsi du.
Gazako Zerrendan jarraitzen duten bahitu israeldarren senideek ere eman dute iritzia, eta Netanyahuren Gobernuari su-eten akordioa onartzeko eskatu diote. "Orain da momentua alde guztiek beren konpromisoa bete eta aukera hau bahitu guztiak itzultzea lortzeko baliatzeko", adierazi du Bahituen eta Desagertuen Familien Foroak ohar batean.
Bestalde, bahituen hainbat senide zeuden talde batek Tel Aviveko errepide nagusia blokeatu du, Israeli akordioa onar dezala eskatzeko, "sinatzen ez badu, su emango diegu kaleei", egin dute mehatxu.
Abbas eta Erdoganek Israel presionatzeko eskatu diote nazioarteko komunitateari
Recep Tayyip Erdogan Turkiako presidentea pozik agertu da Hamasen iragarpenarekin, eta gauza bera egiteko deia egin dio Israeli. "Gustura gaude Hamasek gure iradokizunen ondoren su-etena onartzen duela iragarri duelako. Orain Israelek pauso bera eman behar du", adierazi du Erdoganek Ministroen Kontseiluaren bileraren ostean emandako prentsaurrekoan. "Mendebaldeko eragile guztiek presio egin beharko liokete Israelgo gobernuari. Hori egiteko eskatzen dizuet", gaineratu du agintari turkiarrak. Gauza bera eskatu dio nazioarteko komunitateari Mahmoud Abbas Palestinako presidenteak ere.
Estatu Batuetako Gobernuak uko egin dio gaiari buruzko iritzia emateari. "Hamasen erantzuna aztertzen ari gara, eta inguru hartan ditugun aliatuekin eztabaidatzen ari gara", adierazi du Matthew Miller Estatu Departamentuko bozeramaileak prentsaurreko batean. Era berean, Joe Bidenen Gobernuaren ustez, "bahituak askatzeko akordio bat" dela aukerarik onena, "bai Palestinako herriarentzat, bai Israelentzat", gehitu du.
Rafahko erasoaren atarian
Israelek Rafah ebakuatzeko agindua eman eta ordu gutxira etorri da Hamasen iragarpena, erasoaldi militarra iristear dagoela dirudienean. Izan ere, Israelek ez du etsitzen eta Rafahn sartu nahi du, Hamasen "azken gotorlekua" dela argudiatuta, baina aliatuek ez dute eraso hori babesten. Gaur bertan "Rafahra ez sartzeko" esan zio Bidenek Netanyahuri berriz ere.
Ildo berean, Josep Borrell EBko diplomazia buruak lurreko ofentsiba hori onartezina dela berretsi du eta EBri eskatu dio neurriak har ditzala hori gerta ez dadin.
Gaur egun, 1,2 milioi desplazatu baino gehiago bizi dira Rafahn pilatuta, Gazako zerrenda iparraldetik hegoaldera garbitu duten tropa israeldarren ondorioz.
Albiste gehiago mundua
Brasilgo Justiziak Bolsonarori orkatilako elektroniko bat jarri dio haren mugimenduak kontrolatzeko, Trumpen mehatxuei aurre eginez
Erabakia Alexandre de Moraes epaileak hartu du. Bolsonarori "justizia oztopatzea" egotzi dio. Era berean, epailearen ahotan, buruzagi ohi ultraeskuindarrak "atzerriko gobernu bat Brasilen aurka egitea eskatu, bultzatu eta lagundu du".
Tomorrowlandek agertoki nagusi berri batekin ireki ditu ateak
Eszenatoki berria sugarrek kiskali zuten jatorrizko eszenatokiaren hezurdura suntsituaren aurrean jarri dute. Oraindik ez da ezagutzen sutearen arrazoia, baina zenbait hedabideren arabera, sua hasi aurretik su artifizialak entzun ziren.
Salvini berriro epaituko dute, errefuxiatuz betetako Open Arms ontzia 2019an Lampedusan porturatzea eragozteagatik
Salvinik, orduko Barne ministroak, Open Arms itsasontzi batek erreskatatutako 147 migratzaile lehorreratzea galarazi zuen 20 egunez. Palermoko auzitegi batek botere-abusu eta askatasun-gabetze karguetatik absolbitu zuen orduko Barne ministroa 2024an.
Poliziak Bolsonaroren etxea miatu du eta AEBetako Gobernuarekin maniobrak egitea leporatu dio, Brasil zigortzeko
Brasilgo Poliziaren arabera, Jair Bolsonaro Brasilgo presidente ohiak eta haren seme Eduardok Estatu Batuetako Gobernuarekin maniobrak egin dituzte azken hilabeteetan, "Brasilgo Estatuko agente publikoei" zigorrak ezartzeko eta Gorte Gorena buruzagi ultraren aurkako epaiketa artxibatzera behartzeko.
Etxe Zuriak Maurene Comeyren, Jeffrey Epstein auzipetu zuen fiskalaren, kargugabetzea baieztatu du
Bestalde, Comeyk "arrazoirik gabe" kaleratu dutela salatu du, eta Donald Trump AEBko presidenteari egindako akusazioan, "beldurra tirano baten tresna" dela adierazi du.
Gainpopulazioa Europako kartzeletan
Kontseilu Europarrak kontinenteko espetxeetako masifikazioari buruz ohartarazi du; izan ere, badira plaza erabilgarriak baino preso gehiago dituzten herrialdeak.
Israelek 500 pertsona baino gehiago hil ditu azken bost egunetan Gazan
Gaur goizean bertan, Israelek gutxienez hiru pertsona hil ditu Gazan dagoen parrokia katoliko bakarraren aurka egindako bonbardaketan. Eliza ehunka errefuxiaturen babeslekua da.
Coca-Colak kanabera azukrea erabiliko du AEBn merkaturatzen dituen freskagarrietan, Trumpek eskatuta
"Coca-Colan erantzukizuna duten guztiei eskerrak eman nahi dizkiet. Oso erabaki ona izango da. Ikusiko duzue. Hobe da, besterik ez!", esan du AEBko presidenteak.
Erresuma Batuak 16 urtera jaitsi du botoa emateko adina
Neurria 2029rako aurreikusita dauden hauteskunde orokorrak baino lehen sartuko da indarrean. 1969an adin hori 21 urtetik 18ra jaitsi zenetik egin den hauteskunde-erreformarik handiena da.
Itxaropenerako leihorik ez: Askatasunaren Ontzidia berriro itsasoratu da
Handala ontzia igande honetan itsasoratu da berriro Gazako Zerrendara bidean.