Erresuma Batua Ukrainan tropak zabaltzeko prest, baina Espainiak, Alemaniak eta Poloniak baztertu egin dute

Europako buruzagi nagusiak Parisen bildu dira, Emmanuel Macron Frantziako presidenteak deitutako premiazko goi-bilera informal batean, "Ukrainan balizko bake-prozesu baterako estrategia diseinatzeko", AEB eta Errusia kidetzen ari direla eta, Europar Batasuna bazterrean utzita. EBko 27 buruzagietatik 7 baino ez dira joan Parisera, eta oraindik ez dago aurreikusita goi-bilerarik Bruselan.

Eliseora hainbat herrialdetako agintariak joan dira, hala nola Olaf Scholz Alemaniako kantzilerra, Pedro Sanchez Espainiako Gobernuko presidentea, Dick Schoof Herbehereetako lehen ministroa eta Donald Tusk Poloniako lehen ministroa.

Keir Starmer Erresuma Batuko lehen ministroak eztabaida horietan Europar Batasunarekin batera ahotsa izan nahi du, eta Antonio Costa Europako Kontseiluaren presidentea, Ursula von der Leyen Europako Batzordearen presidentea eta Mark Rutte NATOren idazkari nagusia ere bertan izan dira.

Bileraren aurretik, Macronek telefonoz hitz egin du Donald Trump AEBko presidentearekin, baina ez dute elkarrizketaren gainekoxehetasunik eman.

Defentsaren eta segurtasunaren sektorearekin zerikusia duten Kontinente Zaharreko enpresa nagusien kotizazioak igoera nabarmenak izan ditu gaur, Parisen goi-bilera egin eta Europako gobernuek gastu handiagoa egiteko itxaropenarekin bat etorriz. Horrela, sektoreko enpresa nagusiak biltzen dituen Stoxx Aerospace & Defence indizeak % 4 baino gehiago gora egin du.

The Telegraph egunkarian bart argitaratutako artikulu batean, Starmerrek adierazi du Erresuma Batuko tropak Ukrainan zabaltzeko prest dagoela, segurtasun-bermeen alde egiteko.

Hala ere, Tuskek baztertu egin du balizko operazio militar batean parte hartuko lukeenik. Poloniako lehen ministroak zehaztu du prest dagoela tropak bidaltzea adosten duten estatuei laguntza "logistikoa" eta "politikoa" emateko.

Espainia ere Poloniaren uste berekoa da. Horrela, Pedro Sanchez Espainiako Gobernuko presidentearen ustez, "goizegi" da tropak Ukrainara bidaltzeko. "Oraindik gerran gaude Ukrainan, soldaduak daude han, beren herrialdearen independentzia eta segurtasuna eta Europako eredua defendatzen. Oraindik ez dago bake baldintzak eman horretan pentsatzeko", azaldu du Sanchezek.

Era berean, Olaf Scholz Alemaniako kantzilerrak esan du "une okerra" dela tropei buruzko eztabaida izateko, herrialde horrek "gerra basati" batean murgilduta jarraitzen duelako.

Bestalde, Von der Leyenek adierazi du egoerari "premiaz" begiratu behar zaiola, eta Europaren defentsa bultzatzeko eskatu du. "Parisera iritsi naiz elkarrizketa garrantzitsuak izateko prest. Europako segurtasuna inflexio-puntu batean dago. Bai, Ukrainaz ari gara, baina gureaz ere bai. Premiaz begiratu behar diogu, defentsan bultzada bat behar dugu, biak behar ditugu, orain", idatzi du X sare sozialean.

Nola areagotu gastu militarra?

Euroguneko estatuak bat datoz gastu militarra handitu behar dela, baina ez dute adostu zeregina estatuko aurrekontuekin burutu behar ote den edo finantziazio komuna behar den, bereziki, batasuneko zorra jaulkiz.

Carlos Cuerpo Espainiako Ekonomia ministroak defendatu du Europar Batasunak "tartea" duela "zorra handitzeko", gaur egun bere BPGaren % 2,5 baino ez baita, eta kopurua "oso txikia", munduko beste potentzia batzuekin alderatuz gero.

Aldiz, Eelco Heinen Herbehereetako Finantza ministroak ohartarazi duenez, gastu militarra handitzeko "erabaki gogorrak hartu behar dira aurrekontuan", estatu guztiak euren kontuak onbideratzeko prozesuan murgilduta daudelako eta, ondorioz, beste partida batzuk murriztu beharko lirateke.