Guterresek gaitzetsi egin du AEBk Irani egindako erasoa, eta diplomaziaren bideari eusteko eskatu du

AEBko Armadak, bart, Isfahan, Natanz eta Fordow Irango instalazio nuklearrak bonbardatu izana gogor gaitzetsi du Antonio Guterres Nazio Batuen Erakundeko (NBE) idazkari nagusiak. Egoera oso larria dela esan ondoren, Nazioarteko Zuzenbidea errespetatzeko eta diplomaziaren bideari eusteko eskatu du. Bestela, horren hitzetan, ondorioak "katastrofikoak" izango dira Iranen zein mundu osoan. 

Guterresek X sare sozialean esan duenez, "dagoeneko muturreko egoeran" dagoen herrialde batean halako erasoa egiteak gatazka egoera areagotzea ekarriko du, eta "zuzeneko mehatxua" da bakearen eta nazioarteko segurtasunaren kontra.

NBEko buruaren esanetan, egoera une batetik bestera eskuetatik joan ahal da, eta gatazkan inplikatuta dauden aldeak Nazio Batuen Erakundeko Gutunean jasotakoa betetzera deitu ditu, euren "betebeharra" delako. 

"Ez dago konponbide militarrik. Bide bakarra diplomaziarena da. Bakerako itxaropen bakarra hori da", gaineratu du. 

Eskualde arabiarreko herrialdeen gaitzespena eta elkarrizketarako deia

Hainbat herrialde arabiarrek aho batez gaitzetsi dute AEBk Iranen aurka egindako erasoa, Ekialde Hurbileko segurtasunerako "mehatxu larria" dela iritzita. Bide diplomatikoei eusteko beharra azpimarratu dute.

Basem al Auadi Irakeko Gobernuko bozeramaileak ohar batean gogorarazi duenez, "potentzia handiek eta nazioarteko erakundeek krisi berriak saihestu behar dituzte munduan, ez eragin", eta, gaineratu duenez, "irtenbide militarrek ezin dituzte elkarrizketa eta diplomazia ordezkatu".

Saudi Arabiak, Kanpo Arazoetako Ministerioaren sareetan zabaldutako mezu baten bidez, "kezka" agertu du, eta "moderazioa, tentsioa murrizteko eta indarkeriaren areagotzea saihesteko" eskatu du.

Joseph Aoun Libanoko presidentearen ustez, erasoak "eskualdeko segurtasuna eta egonkortasuna kolokan jartzen ditu”. Era berean, nabarmendu duenez, "Libanok, bere agintariek, alderdiek eta herriak, garesti ordaindu du bere lurraldean eta eskualdean piztu ziren gerrengatik, eta ez dago gehiago ordaintzeko prest, ez dago horretarako inolako interes nazionalik".

"Operazio militar guztiak gelditzeko eta negoziazioei eta bide diplomatikoei berehala ekiteko beharra" azpimarratu du Qatarrek.

Era berean, Omango Atzerri Ministerioak gogorarazi du Nazio Batuen Gutunak debekatu egiten duela estatuen subiranotasun nazionala eta programa nuklearrak helburu baketsuekin garatzeko duten eskubide legitimoa bortxatzea; Energia Atomikoaren Nazioarteko Erakundeak (IAEA) gainbegiratu eta zaintzen ditu programa horiek.

Espainiak, Frantziak eta Italiak, bestalde, tentsioa baretu eta diplomazia baliatzeko deia egin dute. Txilek eta Kolonbiak, berriz, gaitzetsi egin dituzte AEBren erasoak.

Von der Leyenek konpromiso diplomatikoa eskatu dio Irani

Ursula von der Leyen Europako Batzordeko presidenteak igande honetan, AEBk Irango instalazio nuklear nagusien aurka egindako bonbardaketaren ostean, esan duenez, Iranek "irtenbide diplomatiko sinesgarri baterako konpromisoa hartu behar du krisi honi amaiera emateko”.

"Orain da garaia Iranek konponbide diplomatiko sinesgarri bat lortzeko konpromisoa har dezan. Negoziazio mahaia da krisiari amaiera emateko leku bakarra", esan du Europako agintariak sare sozialetan zabaldutako mezu baten bidez.

Von der Leyenen ustez, "Iranek ez du inoiz bonba eskuratu behar", eta "Ekialde Hurbileko tentsioak puntu gorenean egonda, egonkortasunak izan behar du lehentasuna. Horretarako, nazioarteko zuzenbidearen errespetua funtsezkoa da".

Iran: "Israelek eta AEBk lehertu dute diplomazia"

Abbas Araqchi Irango Atzerri ministroak gogor erantzun die Europar Batasunak eta Erresuma Batuak negoziazio-mahaira itzultzeko egindako eskaerei, eta gogorarazi die bere herrialdea Washingtonekin negoziazioetan murgilduta zegoela AEBk eta Israelek eraso egitea erabaki eta “diplomazia lehertu” aurretik.

"Joan den astean Estatu Batuekin negoziatzen ari ginen, eta Israelek diplomazia hori lehertzea erabaki zuen. Joan den astean Europar Batasunarekin eta E3arekin (Erresuma Batua, Alemania eta Frantzia) hitz egiten ari ginen, eta AEBk diplomazia hori lehertzea erabaki du. Zer ondorio ateratzen duzue?", esan die Araqchik Kaja Kallas EBko diplomazialarien buruak eta Keir Starmer Erresuma Batuko lehen ministroak igandean egindako eskaerei.