Erdialdeko eta Hego Amerikako eremu zabalek adi jarraitzen dute tsunami mehatxua

Ozeano Barean, Errusiako Kamtxatka penintsulan inoiz izandako lurrikararik handienetako baten ondorioz sortutako tsunami arriskuaren ondoren, herrialde batzuk, Japonia eta AEB kasu, lasaitasuna berreskuratu dute, nahiz eta Erdialdeko eta Hego Amerikako eremu zabalek erne jarraitu.

Peruk jakinarazi duenez, olatuen altuera 1 eta 2,31 metro artekoa izango da datozen orduetan kostaldean. Horren ondorioz, 65 portu itxi dituzte.

Era berean, Txilek alerta gorria ezarri du, eta kostalde guztia husteko agindua eman du, Arica eta Parinacota eskualdeetatik, iparraldeko muturrean, Magallanesera, hegoaldean.

Japoniako Metereologia Agentziak jakinarazi duenez, han 08:25 zirenean (23:25, Euskal Herrian) izan da lur-astindua. Hasiera batean 8 gradukoa izan dela esan badute ere, azkenean, zehaztu dute 8,8koa izan dela. 

Lehen orduak igarota, pixkanaka-pixkanaka alertak bertan behera uzten edo abisuen maila jaisten hasi dira. Eguerdirako, adibidez, Errusiak, Txinak eta Japoniak indargabetuta zituzten alertak. Hala ere, ahal dela, kostaldera ez hurbiltzeko eta neurriak hartzeko gomendatu diete herritarrei.

Japonian, oraingoz, Ozeano Barearen itsasertz osoan indargabetu du tsunami alerta, hango Meteorologia Agentziak arriskuaren maila jaitsi baitu. Goizean, 2 milioi herritarri baino gehiagori eskatu diete etxetik atera eta barrualdeko eremuetara joateko, badaezpada. 

Bide beretik, Errusiak ere bertan behera utzi du alerta Kamtxatka penintsulan. Aurreneko lur-astindu handiaren ondoren, beste txikiago bat izan da han, Kurile uharteetan, 6,2 gradukoa. 

Lurrikarak lau olatu handi eragin zituen, iparraldeko Kuril uharteetako batean, Paramushirren, eta ez du biktimarik utzi. Lehen olatuak 200 metro egin ditu aurrera, eta hurrengoek Severo-Kurilskeko portuan kalteak sortu ditu. Kurilen artxipelagoan 2.700 pertsona inguru ebakuatu behar izan dituzte.

Eta Txinan ere, eguerdian igorri du mezua Baliabide Naturalen Ministerioak, eta azaldu du Zhejiang eta Shanghai eskualdeetako kostaldean alerta indargabetuta geratu dela. 

Errusiako Ekialde Urruneko eskualdean 1952tik izan den astindurik indartsuena izan da bart gertatutakoa, Errusiako Zientzien Akademiako Zerbitzu Geofisiko Bateratuak gaur Telegrameko kanalean jakinarazi duenez.

Mezu horren arabera, 30 bat erreplika izan dira, 2-5 gradu artekoak, penintsula osoan. Vladimir Solodov Kamtxatkako gobernadoreak azaldu duenez, baliteke ondorengo orduotan erreplika gehiago izatea. 

Lurrikarak eragindako lau olatu handik Kuril uharteen iparraldea hartu dute, eta kalte handiak eragin dituzte. 2.700 herritar inguru aterarazi dituzte etxetik. 

Sare sozialetan zabaldutako mezuan, gobernadoreak zehaztu du gutxienez astebete beharko dela kalteei benetako neurria hartzeko. 

Herrialde ugari, alertan

Japonian, Txinan eta Errusian ez ezik, Amerikako Estatu Batuetan eta Hego Amerikan ere tsunami alertak ezarri dituzte. Batean eta bestean, poliki-poliki ari dira horien maila jaisten. 

AEBko Geologia Zerbitzuak jakinarazi du itsasoaren gainazaletik 18,2 kilometroko sakoneran atzeman dutela astindua, eta, ondorioz, alerta maila gorena ezarri dute, besteak beste, Hawaiin eta Alaskan. Halaber, AEBko eta Kanadako mendebaldeko kostalde osoan ere zabaldu dituzte abisuak.

Josh Green Hawaiiko gobernadoreak larrialdi egoera ezarri du artxipelagoan, eta herritarrei eskatu die kostaldeko eremuak husteko.

Bide beretik, Kanadako agintariek herritarrei eskatu diete ez ondorengo orduotan kostaldeko guneetan ez egoteko.

Mexikon, Perun, Ekuadorren eta Txilen ere aktibatu dituzte alertak.