Israelgo Gobernuak akordioa onartzen duenean sartuko da indarrean Gazako su-etena

"Zalantzarik gabe, ahalegin horiek babesten ditugu. Gazan su-etena baieztatzea denentzako da pozgarria", esan du Dmitri Peskov Errusiako Presidentetzako bozeramaileak. Ildo horretan, ahalegin guztiak "ongietorriaK" direla azpimarratu du.

Hala ere, zuhur agertu da, eta akordioa sinatu arte itxaron behar dela ziurtatu du. "Gaur bertan sinatzea eta gero lortutako akordioak ezartzeko neurriak hartzea espero dugu", laburbildu du.

Israelgo Gobernuak ostegun arratsaldean kabinetean Israelek eta Hamasek Egipton goizaldean lortutako akordioa onartzen duenean sartuko da indarrean Gazako Zerrendako su-etena. Horrela, akordioa Benjamin Netanyahuren Gobernuaren argi berdea lortzen denean hasiko litzateke eragina izaten. Gaur arratsaldean Jerusalemen bilduko dira Israelgo ministroak.

FPLPk (Palestina Askatzeko Fronte Popularra) adierazi duenez, ituna "Gazaren eta herri palestinarraren erresistentzia mitikoaren emaitza da". Atzerriko tutoretza errefusatzen dutela gogorarazi dute, eta Gazako administrazioak "palestinarra" izan behar duela esan dute, "berreraikuntzan eta susperraldian arabiarren eta nazioartearen parte-hartzearekin", esan du.

Emmanuel Macron Frantziako presidenteak adierazi du bere herrialdeak nazioarteko kideekin hitz egiten jarraituko duela gerrari irtenbide politiko bat bilatzeko. "Akordio horrek gerraren amaiera eta bi estaturen konponbidean oinarritutako irtenbide politikoaren hasiera markatu behar ditu", adierazi du Macronek X.n.

Pedro Sanchez Espainiako Gobernuko presidenteak akordioa "bake justu eta iraunkor baten hasiera" izatea espero duela adierazi du. "Orain hitz egitea, biztanleria zibilari laguntzea eta etorkizunari begiratzea dagokigu. Itxaropenez. Baina baita justiziaz eta memoriaz ere. Bizitako ankerkeriak berriro gerta ez daitezen. ", esan du.

Giorgia Meloni Italiako lehen ministroaren hitzetan, iragarpena "sekulako albistea" da. Trumpi eskerrak eman dizkio "Gazako gatazkari amaiera emateko egindako saiakera nekaezinagatik", baita bitartekariei ere. Ziurtatu duenez, "Italiak bitartekarien ahaleginak babesten jarraituko du, eta Gaza egonkortzen, berreraikitzen eta garatzen laguntzeko prest dago".

Friedrich Merz Alemaniako lehen ministroak "pozgarritzat" jo ditu akordiorako lehen urratsak, "itxaropen berri bat eskaintzen dute: bahituentzat eta haien familientzat, Gazako jendearentzat eta eskualde osoarentzat". X-n honako hau gaineratu du: "Alde guztiei eskatzen diegu emandako hitza bete dezatela, gerrari amaiera eman diezaiotela eta bake iraunkorra lortzeko bidea erraztu dezatela. Alemaniak prozesu hau irmoki babesten jarraituko du ".

Benjamin Netanyahuren Israelgo Gobernua ostegun arratsaldean bilduko da Israelek eta Hamasek Egipton goizaldean sinatu duten Gazarako bake planari oniritzia emateko.

Gertuko iturrien arabera, Segurtasun Kabinetearen lehen bilera 17:00etan izango da (16:00etan Euskal Herrian). Defentsa, segurtasun, kanpo eta justizia gaietan giltzarri diren ministroek osatzen dute organo hori, eta Gazako erasoaldian eman beharreko pausoei buruz erabakitzen du.

Ordubete geroago, 18:00etan (17:00ak Euskal Herrian), Israelgo Gobernuaren Kabinetea bilduko da, Netanyahuren Gobernuko ministro guztiak biltzen dituena, akordioa berresteko.

Benjamin Netanyahu Israelgo lehen ministroak akordioa baloratu du, eta "Jainkoaren laguntzarekin" bahitu guztiak etxera ekarriko dituztela adierazi du. Hamasen esku jarraitzen duten 48 bahituetatik 20 inguru bizirik daudela uste dute.

Bahituen senideek "emozio handiz" eta "kezkaz" jaso dute albistea, eta akordioa lehenbailehen onartzea eskatu diote gobernuari. 

Hamasen esanetan, gerraren amaiera ekarriko du akordioak, hori bai, bermeak eskatu ditu Israelek erasoak eten ditzan, eta tropak Gazatik ateratzeaz gain, giza laguntza sar dadila utz dezan. 

Nazio Batuen Erakundeak txalotu egin du akordioa, eta aldeei adostutakoa betetzeko dei egin die Antonio Guterres idazkari nagusiak. 

Lau egunez negoziazioetan aritu ondoren lortu dute akordioa, bitartekarien bidez, Egipton. Israel eta Hamas ez ezik, Qatar, Egipto, Turkia eta Ameriketako Estatu Batuak parte hartzen ari dira negoziazioetan. 

Donald Trump Ameriketako Estatu Batuetako presidenteak egin du iragarpena sare sozialetan, eta Hamasek, Israelek eta Qatarrek eman dute akordioaren berri. 

Israelgo Gobernuak eta Hamasek Gazarako bake-planaren lehen fasea adostu dute ostegun goizaldean. Akordioaren arabera, Hamasek bahituak askatuko ditu Israelek 1.950 preso palestinar inguru libre uztearen truke, eta Israelen tropak adostutako eremuraino erretiratuko dira, Gazako Zerrendatik irten gabe.