Euskadiko eta Nafarroako gobernuek nazioarteko legeria errespetatzeko eskatu dute

Imanol Pradales lehendakariak esan du Eusko Jaurlaritza "gertutik, etengabe eta kezkaz" jarraitzen ari dela Venezuelako egoera, "historikoki errotutako euskal komunitate ugaria baitago bertan". X sare sozialean zabaldu duen mezuan, Europar Batasunaren jarrerarekin bat egin du, "nazioarteko legedia eta Nazio Batuen gutuna errespetatzea" eskatu du, eta "multilateralismoa, elkarrizketa eta diplomaziaren defentsa" aldarrikatu ditu "bakerako eta gatazkak konpontzeko bide gisa". 

Lehendakariaren ustez, "nazioarteko zuzenbidea berme guztiekin errespetatu behar da, demokrazia eta askatasuna herrialdera itzultzea ahalbidetuko duen trantsizio erreala ziurtatzeko. Venezuelarren oinarrizko eskubide eta askatasun guztiak babestuko dituen demokrazia, bai eta haien jardun askea eta subiranotasun osoa ere".

Azkenik, gogora ekarri du "bi euskal herritarrek Venezuelan jarraitzen dutela kartzelan, gutxieneko berme judizialik gabe".

Chivite: "AEBk nazioarteko zuzenbidea eta Venezuelaren subiranotasuna urratu ditu"

Nafarroako Gobernuko presidente Maria Chivitek gogor gaitzetsi du AEBren erasoa, iritzita nazioarteko eskubidea eta Venezuelaren subiranotasuna urratzen dituela.

Sare sozialen bidez zabaldutako mezu batean, ohartarazi du Trumpek ez diela nazioarteko legeei jaramonik egin, "indarrez sartu baita AEBn Venezuela".

EAEko alderdien erreakzioak 

EAJ "kezkatuta" agertu da "Estatu Batuek nazioarteko araudia hautsi dutelako", eta "nazioarteko zuzenbidea errespetatzea" exijitu dio AEBko Gobernuari. Halaber, esan du espero duela venezuelarrek "erregimen demokratiko bat izateko trantsizio politikoa" egiteko aukera izatea.

Gogorrago mintzatu da EH Bildu, AEBk "Venezuelako Bolibartar Errepublikari eraso" diola salatu baitu, eta nazioarteko zuzenbidearen printzipio guztiak urratu dituztela erantsi du. Ildo beretik, Arnaldo Otegi koalizio subiranistaren koordinatzaile nagusiak "gogor" salatu ditu gertakariak, eta "Estatu Batuek Venezuelako herri burujabearen aurka egindako eraso inperialista eta Nicolas Maduro presidentearen bahiketa" arbuiatu ditu.

PSE-EEk ez du oraingoz adierazpenik egin, eta EAEko PPk Alberto Nuñez Feijooren erreakzioa zabaldu besterik ez du egin.

Podemos Euskadik "irmo" gaitzetsi du AEBk Venezuelaren aurka egindako erasoa, eta "giza eskubideen zein demokraziaren defentsaren kontrakoa" dela nabarmendu du. "Inperialismo klasikoaren adierazpen bat da", azpimarratu du. Ezkerreko taldearen arabera, "indarkeria ezin da tresna politikotzat hartu eta ezin dira erasoak justifikatu. Bakea eta subiranotasuna ez dira negoziagarriak". 

ELA sindikatuak AEBk Venezuelako herriaren aurka egindako erasoak gaitzetsi ditu, eta Euskal Herrian egingo diren mobilizazioetan parte hartzeko deia egin du.